Múgedekterge nysandardy beiimdeý jumysyna qoǵamdyq baqylaý kúsheitiledi. Bul jaiynda QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komiteti tóraǵasynyń orynbasary Anarhan Dúisenova aitty, dep habarlaidy QazAqparat.
Anarhan Dúisenova Ortalyq kommýnikatsiialar qyzmetindegi baspasóz máslihatynda múgedektigi bar adamdarǵa nysandardy beiimdeý monitoringin qoǵamdyq baqylaý boiynsha toptardyń jumysy jandandyrylǵanyn atap ótti. Onyń dereginshe, óńirlerdegi monitoringtik toptar 4 myń nysanda beiimdelý sapasyna baǵalaý júrgizip, 3 569 usynym beridi. Anyqtalǵan buzýshylyqtardy joiý boiynsha 1 447 hat joldanyp, 29 uiǵarym jasaldy.
Sondai-aq, jiberilgen zań buzýshylyqtar úshin ákimshilik jaýapkershilikti anyqtaý tártibi Ákimshilik quqyq buzýshylyq týraly kodeks arqyly rettelgenin aitady. Atap aitqanda, áleýmettik jáne kólik infraqurylymy nysandaryna qoljetimdilikti qamtamasyz etpeý, sondai-aq mádeni oiyn-saýyq is-sharalaryna múgedektigi bar adamdardyń qol jetkizýi úshin jaǵdailardy qamtamasyz etpeý laýazymdy tulǵalarǵa 50, shaǵyn kásipkerlik sýbektilerine nemese kommertsiialyq emes uiymdarǵa 120, orta kásipkerlik sýbektilerine 200, iri kásipkerlik sýbektilerine 400 ailyq eseptik kórsetkish mólsherinde aiyppul salýǵa ákep soqtyrady.
«Aiyppuldar somasy baqylaý sýbektileriniń mártebesine bailanysty 145,8 myńnan 1 mln 166,8 myń teńgege deiin ózgeredi. 1 jyl ishinde ákimshilik jaza qoldanylǵannan keiin zań buzýshylyq qaita anyqtalǵan jaǵdaida laýazymdy tulǵalarǵa 80 AEK, shaǵyn kásipkerlik sýbektilerine nemese kommertsiialyq emes uiymdarǵa 150 AEK, orta kásipkerlik sýbektilerine 250 AEK, iri kásipkerlik sýbektilerine 600 AEK mólsherinde aiyppul salynady», – dedi ol.
