Múgedekterdi jumyspen qamtý kvotasyn oryndamaǵan kompaniialarǵa memlekettik satyp alýlarǵa qatysýǵa shekteý engiziledi. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa otyrysynda vedomstvo basshysy Birjan Nurymbetov aitty, dep habarlaidy QazAqparat.
Ministrdiń dereginshe, Qazaqstanda shamamen 695 myń múgedektigi bar adam turady. 2019 jyly múgedekterdi áleýmettik qorǵaýǵa respýblikalyq biýdjetten 323 mlrd teńge bólindi. 2019 jyldyń 1 shildesinen bastap múgedek balanyń jáne 18 jastan asqan bala kezinen birinshi toptaǵy múgedektiń kútimi boiynsha memlekettik járdemaqylardyń mólsheri 30 paiyzǵa ósti. 292 myńnan astam múgedek nemese barlyq muqtaj adamdardyń 70 paiyzy ońaltýdyń qajetti quraldary men qyzmetterimen qamtamasyz etilgen. Sonymen qatar, ol múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deiingi ulttyq jospar aiasynda jumystar júzege asyrylatynyn aitty.
«Ony júzege asyrý aiasynda Áleýmettik qyzmetter portaly kezeń-kezeńimen engizilip jatyr. Onyń kómegimen azamattar memlekettik satyp alýsyz ońaltýdyń qajetti quraldary men qyzmetterin óz betinshe tańdai alady. Osy jyldan bastap portal arqyly jeke tańdaýdy qajet etpeitin tehnikalyq ońaltý quralynyń 24 túrin satyp alady. 2021 jyldan bastap tehnikalyq ońaltý quralynyń barlyq 55 túri qoljetimdi bolady. 2020 jyldyń shildesinen bastap jeke kómekshilerdiń, ymdaý tili mamandarynyń qyzmetteri men sanatorlyq-kýrorttyq emdeý qoljetimdi bolady. Sonymen qatar, biyl alǵash ret elektr jetegi bar qazaqstandyq múgedekter arbalaryn shyǵarý qolǵa alynady. Ekinshi toqsannan bastap biz alǵashqy múgedekter arbasyn bere bastaimyz», – dedi ol.
Onyń aitýynsha, aldaǵy eki jyldyń ishindegi Eńbek ministrliginiń basty mindeti – múgedekterdiń ekonomikalyq belsendiligi úshin múmkindikter jasaý.
«Biz múgedektigi bar adamdardy organizm fýnktsiialarynyń buzylý túrlerine bailanysty jumysqa ornalastyrý jónindegi usynymdarmen kásipter atlasyn ázirleýdi josparlap otyrmyz. Shet elderdiń tájiribesine súiene otyryp, biyl biz memlekettik satyp alý týraly zańnamaǵa ózgerister engizý týraly bastama kóterýdemiz. Múgedektigi bar adamdardy jumyspen qamtý kvotasyn oryndamaityn iri jáne orta kompaniialar úshin memlekettik satyp alýlarǵa qatysýdy shekteitin norma engizý usynylady. Sondai-aq, Japoniia men Germaniia tájiribesine súiene otyryp, biz jumyspen qamtý kvotasynyń ornyna arnaiy qorǵa ótemaqy tóleýdi engizýdiń balama tetigin qarastyryp jatyrmyz. «Eńbek» memlekettik baǵdarlamasy aiasynda mikrokredit jáne qaitarymsyz grant berý quraldary múgedektigi bar adamdardyń biznes bastamalaryna baǵyttalady», – dedi Birjan Nurymbetov.
