Múgedektigi bar adamdar múgedektiktiń barlyq merzimine bir ret Áleýmettik qyzmetter portaly arqyly qyzmetter men ońaltý quralyn alýǵa ótinish beredi. Burynǵy memlekettik satyp alý júiesinde bolǵan jyl saiyn ótinish berý úrdisi alynyp tastalady, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
«Múgedekterdi ońaltýdyń keibir máseleleri týraly» QR Densaýlyq saqtaý jáne áleýmettik damý ministriniń 2015 jylǵy 22 qańtardaǵy № 26 buiryǵyna tiisti ózgeris engizildi. Jańa redaktsiiadaǵy buiryq memlekettik biýdjet esebinen Áleýmettik qyzmetter portaly arqyly ońaltý quraldary men qyzmetterin alýdy retteidi.
«Qujatta jeke kómekshiniń súiemeldeý paraǵyn jáne ymdaý tili mamanynyń qyzmet kórsetý paraǵyn elektrondyq-tsifrlyq qoltańba arqyly áleýmettik qyzmetter portalynda kelisý múmkindigi reglamenttelgen.
Tehnikalyq kómekshi (ornyn toltyrýshy) quraldardy jeke tańdaý qajettiligin eskere otyryp, buiryqta olardyń túrleri, meditsinalyq kórsetkishteri jáne olarǵa qarsy kórsetilimder jazylǵan», delingen habarlamada.
Buryn ońaltýdyń jeke baǵdarlamasynda tek bólme nemese serýen arbasyn usynsa, endi olardyń sany 5-ke deiin artty (belsendi, kóp fýnktsiialy, elektr jetegi bar, qol, iintirekti jetegi bar).
Budan basqa, «Meditsinalyq-áleýmettik saraptama júrgizý qaǵidalaryn bekitý týraly» QR Densaýlyq saqtaý jáne áleýmettik damý ministriniń 2015 jylǵy 30 qańtardaǵy № 44 buiryǵyna (budan ári – MÁS) ózgerister engizildi.
«Túzetýlerdiń negizgi maqsaty – eskirgen quqyq normalaryn joiý úshin qujatty qoldanystaǵy normativtik quqyqtyq aktilerge sáikes keltirý. Atap aitqanda, «Meditsinalyq-áleýmettik saraptama qorytyndysy» jáne «Patsienttiń/múgedektiń ońaltýdyń jeke baǵdarlamasynyń meditsinalyq bóligi» nysandarynyń nómirleri ózgertildi. Budan basqa, kórsetiletin qyzmetti alýshynyń meditsinalyq-áleýmettik saraptama júrgizý nátijeleri boiynsha qujattardy (múgedektigi týraly anyqtama, ońaltýdyń jeke baǵdarlamasynan úzindi kóshirme, jalpy/kásiptik eńbekke qabilettiliginen aiyrylý dárejesi týraly anyqtama jáne t.b.) elektrondyq formatta ETsQ nemese bir rettik paroldi paidalana otyryp, Elektrondy úkimet portalyndaǵy «Jeke kabinet» arqyly alý múmkindigi bóliginde norma engizildi», delingen habarlamada.
