Óskemen qalasynda jalyn sharpyǵan jer úiden múmkindigi shekteýli eki adam shyǵa almai qalǵan. Sol kezde oqiǵa ornyna órt sóndirýshilerden buryn jetken politsiia qyzmetkerleri Qanat Qasymhanov pen Mirhat Ginaiatov esh kidirmesten olardy qutqarýǵa umtyldy, dep habarlaidy QazAqparat.
Oqiǵa 7 jeltoqsan kúni saǵat 07.40-shamasynda boldy. «102» jedel arnasyna Kamchatskaia kóshesindegi jeke turǵyn úidiń órtenip jatqany jaily habar túsken. Sol jerge lezde qalalyq Politsiia basqarmasy patrýldik politsiia batalonynyń qyzmetkerleri Qanat Qasymhanov pen Mirhat Ginaiatov kelip jetedi.
«Úidiń aldynda bir top adam jinalyp qalypty. «Bul úide kim turady?» dep suradyq. Sol kezde olar munda múgedek eki kisiniń turatyndyǵy jaily aitty. Qaqpanyń esigi jabyq bolǵandyqtan áriptesim ekeýimiz sekirip ishke endik. Osy mezette úi ishinen aiqailaǵan daýystar estildi», - deidi aǵa leitenant Qanat Qasymhanov.
Tártip saqshylary órt sóndirýshilerdiń kelip jetkenin kútip turmai terezeni shaǵyp úige kirgen.
«Adam ómirine qaýip tóngende oilanýǵa ýaqyt joq. Syn saǵatta dereý áreket etpesek kesh qalýymyz múmkin. Áiteýir degende bir bólmeden áiel adamdy taptyq. Artynan anyqtalǵandai, oǵan iis tigen eken», - deidi politsei.
Politsiia qyzmetkerleri ony kóterip tereze arqyly syrtqa shyǵarǵan. Sol kezde áiel úide arbaǵa tańylǵan apaiynyń qalyp qoiǵanyn jetkizdi. Saqshylar qaitadan ishke kirip izdeýge kiristi. Biraq úidi tumshalaǵan qoiý tútin men laýlaǵan ot bet qaratpady. Mine osy ýaqytta órt sóndirýshiler kelip jetken. Qutqarýshylar kóp uzamai ekinshi áieldi taýyp aldy. Olarǵa oqiǵa ornynda jedel járdem qyzmetkerleri alǵashqy meditsinalyq kómek kórsetken. Osylaisha, múmkindigi shekteýli eki áiel de aman qaldy.
Kúrshim aýdanynda dúniege kelgen Qanat Qasymhanovtyń quqyq qorǵaý organynda qyzmet etip júrgenine 14 jyldan asypty. Úilengen, eki balasy bar. Al Óskemen qalasynda 1996 jyly týǵan Mirhat Ginaiatov ázirshe boidaq. Saqshylardyń sózinshe, oqiǵa qas-qaǵym sátte óte shyqqan. Búginde olardyń erlikteri baǵalanyp, ShQO Politsiia departamentiniń bastyǵy Saǵat Mádievtiń qolynan gramota aldy.
