Atalmysh nagrada elimizde alǵash ret berildi. Memleket basshysynyń Jarlyǵymen 20-dan astam muǵalim bilim berý salasyna sińirgen eńbegi úshin memlekettik marapatqa ie boldy, dep habarlaidy "Ult aqparat" Bilim jáne ǵylym ministrligine silteme jasap.
Bilim jáne ǵylym ministri Ashat Aimaǵambetov pedagogterge memlekettik nagradany tabys etip, olarǵa alǵys bildirdi.
«Pedagogterge memleket tarapynan erekshe kóńil bólinip jatyr. Memleket basshysynyń tapsyrmasy boiynsha alǵash ret «Qazaqstannyń eńbek sińirgen ustazy« memlekettik nagradasy taǵaiyndaldy. Eńbekterińiz ben óskeleń urpaqty tárbieleýge qosqan úlesterińiz úshin alǵys aitamyn. Nagradalaryńyz qutty bolsyn! Sizderge myqty densaýlyq, otbasylaryńyzǵa amandyq, baq-bereke tileimin», – dedi ministr.
Sondai-aq Bilim jáne ǵylym ministri sońǵy jyldary engizilgen oń ózgeristerge toqtalyp ótti. Máselen, jalaqynyń ósýi, esep berý pen pedagogikalyq júktemeniń tómendeýi, oqýlyqtar men oqý baǵdarlamalaryn ázirleýge qoiylatyn talaptyń kúsheiýi, mektep direktorlaryn taǵaiyndaý jáne pedagogterdi jumysqa qabyldaý qaǵidalarynyń ózgerýi, pedagog mamandyǵy boiynsha oqýǵa túsýge qajet shekti upaidyń artýy, bolashaq muǵalimderdiń ai saiynǵy stipendiiasynyń joǵarylaýy týraly da aityldy.
«Qazaqstannyń eńbek sińirgen ustazy» memlekettik nagradasy muǵalimderge úzdik jetistikteri men memleket aldyndaǵy erekshe eńbegi úshin beriledi. Joǵary ataqqa ie bolǵan pedagog 1 000 AEK (2 917 000 teńge - "Ult aqparat") mólsherinde birjolǵy tólem alady.
Eńbek ardageri, ulaǵatty ustaz Orynsha Qarabalina búgingi tańda pedagog mártebesi zańmen bekitilgenin, endigi kezekte barlyǵy muǵalimderdiń ózderine bailanysty ekenin atap ótti.
«Qazaq halqy aǵartýshylar men ustazdardy tórge otyrǵyzsaq degen edi. Sol ideia búgingi tańda iske asty. Qazir biz tórde otyrmyz. Muǵalimderdi qoǵam da moiyndady. Ata-ana da, oqýshy da muǵalimdersiz tálim-tárbie ala almaitynyn túsindi. Muǵalimderge barlyq jaǵdai jasalyp otyr. Endi muǵalimderdiń ózine bailanysty. Sondyqtan aitarym, ustaz osy ataqqa laiyq bolý kerek. Ol úshin muǵalimniń júris-turysy da, kigen kiimi de, sóilegen sózi de ónege tutarlyqtai bolý kerek. Muǵalim sondai dárejege jetse ǵana oqýshylardyń júreginen oryn alady», – dedi Qazaqstannyń eńbek sińirgen ustazy Orynsha Qarabalina.
«Qazaqstannyń eńbek sińirgen ustazy» qurmetti ataǵyn alǵandarlyń arasynda Almaty oblysy № 1 mektep-gimnaziiasynyń himiia jáne biologiia pániniń muǵalimi Tatiana Stankevich bar. Ol 35 jyl oqýshylarǵa bilim bergen. Ustaz shákirtterine ekologiialyq mádenietti úiretip, jas eriktilerdi tárbielegen. Tatiana Stankevich kóptegen respýblikalyq jáne halyqaralyq baiqaýlardyń jeńimpazy jáne 2013 jyly «Úzdik pedagog» atanǵan.
«Búgin ustazdar úshin aitýly kún. Bul elimizdegi muǵalimderdiń atqarǵan jumysyna berilgen joǵary baǵa. Oqýshynyń qolyna alǵash ret qalam ustatyp, árip tanytqan, bilim bergen muǵalimderdiń zor eńbegine kórsetilgen qurmet úshin alǵysym sheksiz», – dedi Qazaqstannyń eńbek sińirgen ustazy Tatiana Stankevich.
Memlekettik nagradaǵa Petropavl qalasynyń M. Aithojin atyndaǵy № 1 mektep direktory Aleksandr Kýrlenia da ie boldy. Bul marapatty 40 jyldan astam eńbek ótili bar bilikti basshy búkil mektep ujymynyń eńbegi dep sanaidy.
«Osyndai qurmetke bólengenim úshin óte qýanyshtymyn. Bizdiń mektebimizdiń boi kótergenine biyl 100 jyl. Bul memlekettik marapatty ujymdaǵy árbir pedagogtiń atqaryp jatqan eńbegine berilgen joǵary baǵa dep bilemin. Memleket muǵalimderge moraldyq jáne materialdyq jaǵynan da qoldaý kórsetip keledi», – dedi Qazaqstannyń eńbek sińirgen ustazy Aleksandr Kýrlenia.
