Biyldyń 26 mamyry men 17 maýsymy aralyǵynda «Jazǵy mektep» jumys isteidi. Bul týraly QR Bilim jáne ǵylym ministrliginiń Mektepke deiingi jáne orta bilim komitetiniń tóraǵasy Gúlmira Kárimova aitty, dep habarlaidy QazAqparat.
Onyń aitýynsha, pandemiia, shekteý sharalary kezinde oryn alǵan bilimdegi olqylyqtardyń ornyn toltyrý jáne bilim sapasyn arttyrý maqsatynda 2022 jyldyń 26 mamyry men 17 maýsymy aralyǵynda «Jazǵy mektep» jumys isteidi.
Jazǵy mekteptiń maqsaty – belsendi túrde oqýshylardyń bilimin tereńdetý. Jazǵy mektepte bilimdi tolyqtyrý boiynsha oqý protsesi mekteptiń bekitilgen jumys oqý josparyna sáikes júzege asyrylady. Jazǵy mektepke 1-8 jáne 10 synyp oqýshylary qatysady. Jazǵy mektepte bilim alý tegin. Bilim berý uiymy sabaqtardyń ikemdi kestesin jasaidy.
Bilim berý uiymynyń basshysy Jazǵy mekteptiń jumys isteýi týraly buiryq shyǵarady. Bilim berý uiymy qol jetkizilmegen oqý maqsattaryn eskere otyryp, Jazǵy mekteptiń jumys josparyn jasaidy jáne oqý protsesiniń uiymdastyrylýyn jáne oqýshylardyń oqý jetistikterin baqylaidy.
Jazǵy mektep baǵdarlamasyna alshaqtyqty joiý pánderi boiynsha oqý sabaqtarynan basqa, jobalyq jáne ǵylymi-zertteý jumystary, zerthanalyq jumystar, synyptan tys jumystardyń keń aýqymy, dárister, seminarlar, shyǵarmashylyq stýdiialar, sporttyq-shyǵarmashylyq is-sharalar men ekskýrsiialar, ashyq aýada is-sharalar kiredi.
Taratylǵan málimetke qaraǵanda, jazǵy mektep jumysyn uiymdastyrý kezinde muǵalimder biylǵy oqý jylyna bekitilgen júktemesi aiasynda 17 maýsymǵa deiin jumys isteidi, sodan keiin muǵalimderge 56 kúndik demalys beriledi.
