QR Prezidenti Nursultan Nazarbaevtyń Qazaqstan halqyna arnalǵan biylǵy Joldaýyndaǵy 10 negizgi mindettiń biri adam kapitalynyń jańa sapasyna arnalǵan, dep habarlaidy "Ult aqparat".
«Bilim berý júiesiniń barlyq deńgeii zamanaýi ózgerister men ekonomika suranystaryna jaýap berýi tiis. Bul rette muǵalim mamandyǵynyń bedelin arttyrý qajet. Densaýlyq saqtaý salasynda jańa tehnologiialardy qoldaný aýrýdyń aldyn alý men emdeýdi aitarlyqtai jaqsartyp, meditsinalyq qyzmet kórsetý sapasyn kóterýi tiis», - dedi Elbasy óz málimdemesinde.
Memleket basshysy 2016-2017 jyldary Qazaqstandaǵy áleýmettik tólemderdiń úsh ret kóterilgenin eske saldy. Sonyń ishinde bazalyq zeinetaqy - 29 %, yntymaqtyq zeinetaqy - 32%, densaýlyq saqtaý salasyndaǵy eńbekaqy - 28%, bilim berý salasynda - 29% jáne memlekettik qyzmetshilerdiń jalaqysy - 30 paiyzǵa kóbeigen.
«Bul úrdis áli de jalǵasady, - dep atap ótti N.Nazarbaev. - Biyl áleýmettik salaǵa biýdjetten bólingen qarajat 12 paiyzǵa artyp, 4 trln teńgeden asty. Bazalyq zeinetaqy eńbek ótilin esepke ala otyryp, orta eseppen 1,8 esege ulǵaiady. Oqý baǵdarlamalarynyń jańartylǵan mazmuny aiasynda oqytýǵa kóshken muǵalimderdiń laýazymdyq jalaqysy biliktilikterine qarai 30%-dan 50%-ǵa deiin artady».
«Atalǵan mindetterdi oryndaý úshin búkil qoǵamnyń birligi men yntymaǵy kerek. Ol úshin Úkimet pen ákimder keńinen túsindirý jumystaryn júrgizýi qajet. Otanymyzdyń kórkeiýi árkimniń jańa «tsifrlyq dáýir» talaptaryna sai bolýyna bailanysty. Osyny árbir qazaqstandyq tereń túsinýi kerek. Qazaqstannyń jarqyn bolashaǵy jolynda barlyq maqsattarǵa qol jetkizetinimizge kámil senemin», - dep óz sózin túiindedi N.Nazarbaev.
Eske sala keteiik, Elbasy Nursultan Nazarbaev Qazaqstan halqyna arnalǵan jyl saiynǵy Joldaýyna bailanysty respýblikalyq telearnalar efirinen málimdeme berdi jáne júzege asyrylýy tiis 10 negizgi mindetti atap kórsetken edi.
