Nur-Sultan qalasy ákimi apparaty basshysynyń orynbasary Azamat Ahmedjanov 9 maýsymda ótetin kezekten tys Prezident sailaýynda belgili bir kandidatqa daýys berýge qatysty májbúrleý bolmaitynyn aitty, dep habarlaidy QazAqparat tilshisi.
Kezekten tys Prezident sailaýy týraly elorda ákimdiginde ótken baspasóz máslihatynda tilshiler muǵalimder men memlekettik qyzmetshilerdi sailaýǵa kelýge májbúrleý bola ma degen suraq qoiǵan edi. Tilshiler sailaý ýchaskesinde tipti selfi jasaý mindettelgeni jaily buryn aqparat taraǵanyn aityp saýal tastaǵan edi.
«Biz eshkimdi májbúrlegeli otyrǵan joqpyz. Alaida daýys berý úshin sailaý ýchaskesine kelýge shaqyramyz. Álbette, «baryńyzdar, daýys berińizder» dep aitamyz, biraq selfi jasatý degen sekildi, árine, jaǵdailar bolmaidy», - deidi Azamat Ahmedjanov.
Onyń aitýynsha, májbúrleý jaǵdailary kezdesip jatatyn bolsa, elordalyqtar Ikomek qyzmetine shaǵym túsire alady.
«Ikomek-ten kelgen aqparat ákimdik apparatyna túsedi. Álbette, barlyǵyn sailaýǵa shaqyramyz, biraq májbúrlemeimiz», - deidi ol.
Eske sala ketsek, buǵan deiin habarlaǵanymyzdai, Qazaqstanda 9 maýsym kúni ótetin kezekten tys Prezident sailaýynda elordalyqtar 304 sailaý ýchaskesinde daýys bere alady.
«Elordada 304 sailaý ýchaskesi tirkelgen. Onyń 239-y qala ishinde. 65-i shetelderdegi ókildikterde, elshilikter men konsýldyqtarda. Sheteldegi sailaý ýchaskelerimen Syrtqy ister ministri ainalysady. Jalpy, bizdiń esebimiz boiynsha Nur-Sultanda 600 myńǵa jýyq daýys berýshi bolady. Biraq, bul naqty san emes. Sailaý kúni qarsańynda naqty qansha elordalyqtyń daýys bere alatyny jaily qosymsha aqparat beremiz», - dedi Nur-Sultan qalasy ákimi apparaty basshysynyń orynbasary.
Baspasóz máslihaty barysynda Nur-Sultan qalasy ákimi apparaty basshysynyń orynbasary Azamat Ahmedjanov sondai-aq, elordada tirkelmei jumys istep júrgen azamattar qalai daýys bere alatynyn túsindirgen bolatyn.
«Sailaýshylar tizimin naqtylaý jáne ózektendirý maqsatynda 2019 jyldyń 15 sáýirinen 29-na deiin elordadaǵy JOO men kolledj stýdentteri qatarynan tartylǵan eriktiler (400) men politsiia qyzmetkerleriniń (400 adam) kúshimen aýlalyq jáne páterlik aralaý boiynsha naýqan uiymdastyrylady. Olardyń jumys tártipteri - saǵat 18.00-den 23.00-ge deiin bolady. Al demalys kúnderi saǵat 11.00-den 18.00 aralyǵynda eriktiler politsiia qyzmetkerlerimen birge aralaityn bolady. Turǵyndardyń atalǵan jumysqa túsinistikpen qarap, kómek kórsetýdi suraimyz», - dedi Azamat Ahmedjanov qalalyq ákimdiktegi brifingte.
Qala ákimdiginiń ókili eriktilerde arnaiy beidj-qujat (móri basylǵan) bolatynyn jáne olardyń janynda mindetti túrde politsiia qyzmetkeri júretinin eskertedi.
«Eriktiler azamattardyń tirkelý faktisi men naqty turatyn jerin qarap, barlyq turǵyndardy qaita jazyp, memlekettik derekter bazasymen salystyrady. Bul derekter aýdandyq ákimdikterde jinaqtalyp, sailaýshylar tizimine túzetýler engiziledi.
Qalada tirkeýi joq adamdar boiynsha: birinshiden, basqa óńirlerden kelip, ýaqytsha tirkelip, jumys istep jatqandar kóp. Sol sebepti, olar zańdy negizde bizdiń aýdandyq ákimdikterge habarlasyp, óziniń ótinishterin qaldyrýyna bolady. Biz ol tizimdi alyp, aimaqtarǵa jiberip, bizdiń ýchaskelerge qosamyz. Sondai múmkindikter bar», - deidi ol.
