Bilim jáne ǵylym ministrliginde mektep pedagogteri úshin tegin tsifrlyq kýrstar ázirlendi, dep habarlaidy "Ult aqparat".
Onlain kýrstar 2 tamyzda bastalyp, 31 qazanǵa deiin jalǵasady. Oǵan pedagogikalyq joǵary oqý oryndarynyń stýdentteri de qatysa alady.
«Pandemiia jaǵdaiynda muǵalimderdiń róli, qoǵamdaǵy orny men eńbegi odan ári aiqyndala tústi. Tsifrlandyrý zamanynda muǵalimderdiń IT quzirettilikterin arttyrý qajet. Kýrs pedagogterdiń tsifrlyq daǵdylaryn jetildirýge baǵyttalǵan. Kýrs baǵdarlamasy Eýropalyq bilim qorymen birlesip ázirlendi. EBQ sarapshysy beinepedagogika negizderi boiynsha sessiia ótkizip, beinematerialdar jasaý boiynsha óz ádistemesimen bólisedi. Kýrs bilim jáne ǵylym ministrliginiń www.edu.kz platformasynda ornalastyrylady. Sondai-aq Microsoft Kazakhstan, Bilim Media Group jáne Kundelik oqytý kýrsy aiasynda pedagogterge arnalǵan beinedárister ázirledi», – dedi QR BǴM «Órleý» biliktilikti arttyrý ulttyq ortalyǵynyń basqarma tóraiymy Ásel Muhametjanova.
Qazaqstandyq muǵalimder Finliandiia men Ońtústik Koreianyń bilim berý protsesine innovatsiialyq tehnologiialardy integratsiialaý tájiribesimen tanysady.
Kýrsta tsifrlyq bilim berý tehnologiialaryn paidalana otyryp, pedagogterdi sabaqty jobalaý ádistemelerine úiretedi.
Sondai-aq pedagogter ActivStudio, Pictochart, Jamboard, Prezi, Flippity sandyq baǵdarlamalaryn kásibi túrde meńgerip, ulttyq bilim derekqorynyń resýrstaryn paidalanýdy úirenedi.
QR BǴM qosymsha bilim pedagogteri úshin de kýrstar uiymdastyryp, qazirgi tańda 2000-ǵa jýyq pedagog biliktiligin arttyrdy.
Olar úshin jetekshi ǵalymdardyń, oqytýshylardyń jáne praktik-pedagogterdiń arnaiy master-klastary uiymdastyryldy.
«Kýrstyń árbir qatysýshysy óz tájiribesin basqalardyń nátijelerimen salystyrýǵa, óziniń atqarǵan jumysynyń baǵasyn bilýge, sondai-aq áriptesteriniń, ǵalymdardyń, ádisker-praktikterdiń keńesteri men usynymdaryn tyńdaýǵa múmkindik aldy. Biliktilikti arttyrý kýrstary pedagogterdi jetildirýge kómektesip, olardyń kásibi qarym-qatynas aiasyn keńeitedi», –dep atap ótti QR BǴM Respýblikalyq qosymsha bilim berý oqý-ádistemelik ortalyǵynyń direktory Raisa Sher.
