Qazaqstandaǵy mektepterdi bes kúndik oqý aptasyna kóshirý máselesi jyl sońyna deiin sheshiledi. Bul týraly Bilim jáne ǵylym vitse-ministri Fatima Jaqypova aitty. dep habarlaidy Sputnik Qazaqstan.
"Qazir muǵalimder qaýymyn mazalap otyrǵan úlken másele – bul bes kúndik jumys aptasy. BAQ betterinen Ashat Qanatulynyń (ministr Aimaǵambetov) buǵan qatysty aitqanyn oqydyńyzdar. Ár mektep pedagogtar keńesinde bul máseleni talqylap, ózderiniń tiptik oqý josparlaryna qarai bes kúndik oqý aptasyna kóshe alady. Bilim jáne ǵylym ministrligi mektepterge osyny usynyp otyr", - dedi vitse-ministr elordada ótken tamyz konferentsiiasynda.
Aitýynsha, eger mektep bes kúndik oqý aptasyna aýyssa, muǵalim senbi kúndi óz qalaýyna qarai ótkizýge quqyly.
"Muǵalimder ol kúndi úide, balalarynyń qasynda ótkize alady. Biraq, mektep ákimshiligi aiyna bir ret pedagogikalyq keńesti shaqyryp, ne bolmasa taǵy basqa sharalar uiymdastyrýy múmkin. Sondyqtan bes kúndik jumys aptasyna qatysty másele biyl túpkilikti sheshiledi degen oidamyz", - dedi Jaqypova.
Aita ketsek, Qazaqstan Prezidenti Qasym-Jomart Toqaevtyń qatysýymen ótken tamyz konferentsiiasynda Bilim ministri Ashat Aimaǵambetov mektepterge bes kúndik oqý aptasyna kóshýdi usynǵan bolatyn. Qazir keibir óńirlerde muǵalimder aptasyna bes kún ǵana isteidi. Biraq, senbi kúni de mektepke shaqyrylatyn kórinedi.
