Endi pedagogikalyq eńbek ótili 30 jylǵa tolǵan ustazdardyń zeinetke shyǵýǵa múmkindigi bar. Bul týraly QR Bilim jáne ǵylym ministrliginiń Mektepke deiingi jáne orta bilim departamenti direktorynyń orynbasary Sáýle Kabimoldaeva málim etti, dep habarlaidy Baq.kz agenttigi.
Búgin Astanadaǵy №59 mektepte «Muǵalimder mártebesi týraly» zańynyń jobasy talqyǵa salyndy. Sharaǵa QR Bilim jáne ǵylym ministri Elmira Sýhanberdieva, Astana qalasy bilim basqarmasynyń basshysy Ánýar Janǵozin qatysty.
Zań jobasyndaǵy usynystardy muǵalimderge Sáýle Kabimoldaeva tanystyrdy. Onyń aitýynsha, endi ustazdardyń pedagogikalyq eńbek ótili 30 jylǵa tolsa, olar zeinet shyǵa alady.
«Zeinetke shyǵý máselesine toqtalaiyn. Zeinetke shyǵý jasyna sáikes pedagogikalyq eńbek ótili 30 jyl bolýy kerek. Bul usynys barlyq óńirlerden kelip tústi. Biz pedagogikalyq eńbek ótili 30-35 jyl bolý kerek dep uzaq talqyladyq. Kórshi elderdiń tájiribesin qaradyq. Keńes ókimeti kezinen TMD elderinde bul tájiribe saqtalǵan. Sondyqtan 30 jyl jumys istegen soń, (muǵalimder – avtor) zeinetke shyǵa alady degen sheshimge keldik», - dedi ol.
Jiynda Elmira Sýhanberdieva atalǵan zań jobasy aqpan aiynyń basynda Májiliste tanystyrylatynyn atap ótti.
Aita keteiik, ótken jyly Elbasy Qazaqstan halqyna Joldaýynda úkimetke muǵalim mártebesi týraly zań jobasyn daiyndaýdy tapsyrdy.
