Áleýmettik meditsinalyq saqtandyrý qorynyń infraqurylymdary 2020 jyly halyqqa kórsetiletin qyzmetterdi satyp alýǵa tolyǵymen daiyn. Qor meditsinalyq saqtandyrý salasyndaǵy ozyq tájiribelerdi qoldanysqa engizip, júieni damytý jumystaryn aldaǵy ýaqytta da toqtatpaidy. Bul týraly ońtústik astanada meditsinalyq saqtandyrý máseleleri jónindegi aimaqtyq shtab otyrysynda «Áleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov málimdedi.
Qor basshysy aldaǵy jyly Almatyda meditsinalyq kómekke bólinetin qarajat bir jarym ese artatynyn alǵa tartty.
«Naqtyraq aitqanda, 2019 jyly qala turǵyndaryna memlekettik tapsyrys sheńberinde kórsetiletin tegin meditsinalyq kómekke 114,9 mlrd teńge bólingen bolsa, kelesi jyly bul soma 160,4 mlrd teńgege jetpek», - dep atap ótti A. Jumaǵulov.
MSQ tóraǵasynyń sózine súiensek, bul meditsinalyq saqtandyrý júiesiniń engizilýimen tyǵyz bailanysty.
Birer aidan keiin tolyq iske qosylatyn reformanyń negizgi maqsaty meditsinalyq qyzmettiń sapasy men qoljetimdiligin arttyrý bolǵandyqtan reformany aqparattyq-túsindirý jumystaryna jiti kóńil bólinip otyr. Osyǵan bailanysty Almaty ákimdigi turǵyndar arasynda aqparattandyrý jumystaryn kúsheitý jóninde naqty tapsyrmalar berdi.
«Reforma qarsańynda qala turǵyndarynyń MÁMS jaily bilý deńgeiin kóterýimiz qajet. Ásirese, biresmi jumys isteitin azamattardyń statýsyn anyqtaýdyń mańyzy zor. Sol sebepti ár turǵynǵa durys málimet berý, sondai-aq, týyndaǵan suraqtarǵa tolyqqandy jaýap berý reformanyń tabysty júzege asyrylýyna septigin tigizedi», - dedi Almaty ákiminiń orynbasary Erjan Babaqumarov.
Sonymen qatar, Meditsinalyq saqtandyrý qory jýyq arada jeke bailanys ortalyǵyn iske qospaq. 1406 biryńǵai bailanys ortalyǵy sarapshylary halyqqa meditsinalyq kómek pen saqtandyrý jarnasyna qatysty jan-jaqty málimet berip, jurtshylyqtan túsken aryz-shaǵymdarmen ainalysady.
Esterińizge sala ketsek, «Áleýmettik meditsinalyq saqtandyrý qory» KEAQ kepildendirilgen tegin meditsinalyq kómek pen áleýmettik meditsinalyq saqtandyrý júiesi sheńberinde kórsetiletin qyzmetterdiń qarjy operatory bolyp tabylady.
