Foto: ashyq derekkóz
9 qyrkúiekte Moody's halyqaralyq reiting agenttigi Qazaqstandy uzaq merzimnen keiin Baa2-den Baa1-ge kóterdi. Iaǵni elimiz biyl táýelsizdik jyldaryndaǵy eń joǵary nátijege ie boldy, dep habarlaidy "Ult aqparat" Ulttyq ekonomika ministrligine silteme jasap.
Ulttyq ekonomika ministrligi Qazaqstan “turaqty” dep boljanǵanyn málimdedi.
"Qazaqstannyń nesielik reitinginiń joǵarylaýy ekonomikanyń institýtsionaldyq jáne saiasi ortanyń úzdiksiz jaqsarýymen bailanysty. Bul faktorlar ekonomikalyq turaqtylyqty nyǵaitýǵa jáne nesielik reitingin joǵary elderdiń dárejesine deiin jetkizýge yqpal etedi", – delingen habarlamada.
Moody's memlekettik basqarý jáne sybailas jemqorlyqqa qarsy kúrestegi progressti atap ótedi. Sarapshylardyń málimdeýinshe, júrgizilip jatqan reformalar saiasi turaqtylyqqa, azamattyq belsendilikke jáne sybailas jemqorlyqqa qarsy sharalardyń ashyqtyǵyna oń áser etedi.
"Moody's tómen deńgeili jáne qaryzdy tóleý múmkindigi joǵary Qazaqstannyń senimdi qarjylyq kórsetkishterin, sondai-aq biýdjet tapshylyǵyn JIÓ-niń 2,5-3% deńgeiinde ustap turǵan úkimettiń sarabdal saiasatyn atap kórsetedi. Jańa reformalar, sonyń ishinde jańa Biýdjet jáne Salyq kodeksterin engizý fiskaldyq saiasattyń tiimdiligin, qarjylyq eseptilik pen salyq túsimderin arttyrýy tiis", – dedi ministrlik.
Sondai-aq baiandamada Qazaqstan ekonomikasynyń qurylymyndaǵy shikizattyq emes sektor úlesiniń ulǵaiýy atap ótilgen. Demek eldiń kómirsýtekterge táýeldiligi azaiyp, munai baǵasyna bailanysty táýekeli tómendegen dep jazylǵan.
Moody's sarapshylary biznes-klimatty jaqsartý jáne investitsiia tartý boiynsha atqarylǵan jumystardy, qolaily biznes ekojúiesin qurý jáne biýrokratiialyq kedergilerdi azaitý boiynsha qabyldanǵan sharalardy oń baǵalady. Ulttyq tsifrlyq investitsiialyq platformany iske qosý ákimshilik protsesterdi jedeldetýge kómektesedi.
Mamandar basqa shikizat óndirýshi eldermen salystyrǵanda Qazaqstannyń ekonomikalyq bolashaǵy kúshti ekenin de atap ótti. Agenttiktiń pikirinshe, júrgizilip jatqan reformalar eldiń básekege qabilettiligin nyǵaitady.
Olardyń pikirinshe, kólik-logistika sektorynyń damýy – eldiń ósý faktorlarynyń biri. Bul Transkaspii halyqaralyq saýda joly boiynsha júkterdiń tranzitindegi belsendiliktiń qarqyndy ósýine bailanysty aitylǵan. Orta dálizdiń keleshegi el ekonomikasynyń ártúrli shikizattyq emes sektorlaryna, sonyń ishinde avtomobil jasaý, farmatsevtika, tamaq ónerkásibi jáne qurylys materialdary salalaryna sheteldik investorlardy tartýǵa múmkindik beredi.
Moody's – amerikalyq korporatsiia, oǵan Moody's Investors Service halyqaralyq reiting agenttigi kiredi. Ol nesie reitingterin júrgizip, zertteý jasaidy jáne táýekelderdi taldaýmen ainalysady.
