Elordada ótip jatqan álemdik jáne dástúrli dinder kóshbasshylary sezi hatshylyǵynyń HIH otyrysynda Dinaralyq dialog boiynsha Papa Keńesiniń islam jónindegi biýro basshysy Monsenor Haled Akashe Qazaqstannyń dini dialog ornatýǵa qosqan úlesin erekshe baǵalady, dep habarlaidy QazAqparat.
«Shyn máninde ár adam – qudiretti jáne jomart jaratýshymyzdyń sheksiz bailyǵy men erekshe jomarttyǵynyń kýási. Biz osy ortaǵa qaita kelip, kezdesýdiń sáti túskenine qýanyshtymyz. Biraq, árine, quzyretti organdardyń barlyq qajetti usynystaryn oryndap otyrmyz. Joǵary mártebeli Máýlen Áshimbaev myrzaǵa izgi tilegimdi bildirgim keledi», - degen din ókili óz duǵalaryn pandemiiadan zardap shekkenderdiń bárine baǵyshtaitynyn aitty.
«Pandemiia adamzatqa, memleketterge, dini qaýymdastyqtarǵa, barshamyzǵa densaýlyq saqtaý, ekonomika, áleýmettik kelisim nemese yntymaqtastyq siiaqty ómirimizdiń kóptegen salalaryndaǵy shekteýler men kemshilikter týraly bilýge múmkindik berdi. Din kóshbasshylary men olardyń artynda turǵan qaýymdastyqtar pandemiiadan zardap shekkenderge tilektestik bildiredi», - dedi Monsenor Haled Akashe.
Dinaralyq dialog boiynsha Papa Keńesiniń islam jónindegi biýro basshysy osyndai kúrdeli kezeńde dástúrli sezdiń ótýine kúsh sala bilgen Qazaqstan basshylyǵyna alǵysyn aitty.
«Biz VII sezdi asyǵa jáne úmitpen kútemiz, joǵary mártebeli QR Tuńǵysh Prezidenti-Elbasy Nursultan Nazarbaev myrzaǵa sezge bastamashylyq jasaǵany jáne batyl qoldaý kórsetkeni úshin zor rizashylyǵymyzdy bildiremiz. Qazirgi Prezident, joǵary mártebeli Qasym-Jomart Toqaev uzaq jyldar boiy hatshylyqty basqaryp, óziniń danalyǵy men darynyn dinaralyq jáne mádenietaralyq únqatysýdyń igi isine jumsady», - dedi din ókili.
