QR Parlamenti Májilisiniń jalpy otyrysynda «Qazaqstan men Mońǵoliia arasyndaǵy sottalǵan adamdardy berý týraly shartty ratifikatsiialaý týraly» zań jobasy maquldandy, dep habarlaidy "Ult aqparat".
Zań jobasy 2018 jyly naýryzda Astanada jasalǵan shartty ratifikatsiialaýǵa baǵyttalǵan. Qujat eki el arasyndaǵy quqyqtyq qatynasqa qorytyndy jasaidy. Shart sottalǵan adamnyń jazasyn óz elinde óteýdi qamtamasyz etpek. Qujat boiynsha sottalǵan adamdy berý úshin tiisti negizder eskerilgen. Bul turǵyda adam qabyldaýshy taraptyń azamaty bolýy, jasalǵan áreket eki jaqtyń zańy boiynsha qylmys dep sanalýy, ótelmegen jaza keminde bir jyldy quraýy kerek.
«Árine, berýden de bas tartý negizderi kózdelgen. Mysaly, el egenmendigine, qaýipsizdigine, qoǵamdyq tártipke nuqsan keltiretin bolsa, sottalǵan adam qylmystan kelgen zalalyn ótemese nemese bizdiń azamattarǵa qaryz bolsa. Qazirgi tańda Mońǵoliiada jazasyn ótep jatqan Qazaqstan azamattary joq. Al elimizde Mońǵoliianyń 5 azamaty jazasyn ótep jatyr», - dep naqtylady QR Bas prokýrorynyń orynbasary Marat Ahmetjanov.
Onyń sózine qaraǵanda, osyǵan uqsas shartty elimiz 22 memleketpen bekitken. Jaqynda osyndai qujatqa Ózbekstan, Vetnam, Kipr, Argentina, Dominikan jáne basqa da eldermen qol qoiý josparlanǵan.
