9 maýsym kúni Mońǵoliiada el prezidentin sailaý bastaldy. Bul týraly eldiń MONTsAME aqparat agenttigi habarlady.
Sailaý ýchaskeleri jergilikti ýaqyt boiynsha tańǵy saǵat 7:00-de ashylyp, 22:00-ge deiin jumys isteitin bolady.
Biylǵy jyldan bastap Mońǵoliia prezidenti 6 jyldyq merzimge sailanady. Prezident qyzmetine osy joly usynylǵan kandidattar arasynda Mońǵol Halyq partiiasynyń atynan – L.Hýrelsýha, Demokratiialyq partiiadan – S.Erdene jáne «Jóni durys adam, Elektorat» koalitsiiasynan D.Enhbata bar.
Sailaýshylar tiziminde 2 040 784 adam tirkelgen. Bul kúni búkil el boiynsha 2087 sailaý ýchaskesi jumys istep otyr, al biýlletender qoldan sanalady.
Keshe, 8 maýsym kúni daýys berýge arnalǵan kóshpeli sailaý jáshikteriniń kómegimen eldiń 25 619 azamaty daýys bergen. Sondai-aq, qyzyl aimaqta jumys istep júrgen memlekettik qyzmetshiler, abaqtyda otyrǵan 7 051 azamat jáne infektsiia juqtyrmaǵan, biraq sailaý ýchaskelerine kele almaityn shamamen 18 myń adam daýys berdi. Budan basqa, Mońǵoliianyń 30 eldegi 44 diplomatiialyq ókildiginde sailaý ýchaskeleri qurylyp, 30-31 mamyr kúnderi merziminen buryn daýys berý ótti. Shetelde tirkelgen 7 394 azamattyń 76 paiyzy (5 618 adam) óz tańdaýyn jasady.
Prezidenttik sailaýdy sheteldik jáne halyqaralyq uiymdardyń 43 uiymy baqylap, 40 tilshi aqparat taratady.
