Qarjy ministrligi mobildik aqsha aýdarymdaryn jeke jáne kásipkerlik maqsattarǵa bólý máselesin pysyqtap jatyr, dep habarlaidy "Ult aqparat".
Bul týraly Qarjy Ministri Erulan Jamaýbaev Májilis ókilderiniń depýtattyq saýalyna bergen jaýabynda málim etti.
«Aýdarymdardyń kommertsiialyq maqsattarda keńinen taralýyna bailanysty ministrlik Ulttyq bankpen, Qarjy naryǵyn retteý jáne damytý agenttigimen, Qazaqstan qarjygerleriniń qaýymdastyǵymen jáne ekinshi deńgeidegi banktermen birlesip qoldanystaǵy tetikti saqtai otyryp, mobildik aýdarymdardy jeke jáne kásipkerlik maqsattarǵa bólý jónindegi fýnktsionaldy zańnamalyq retteý jáne iske asyrý máselelerin pysyqtaýda. Búgingi tańda birqatar usynystar men zańnamalyq bastamalar anyqtaldy», - dep jazady ministr.
Ministrlik mamandary kásipkerlerdi elektrondy aýdarym arqyly jasalatyn tólemderdi qabyldaityn arnaiy shot ashýǵa mindetteý kerek degen bastama kótermek. Sondai-aq, «mobildi tólemder» uǵymynyń zańdyq turǵyda anyqtamasyn bekitýdi usynyp otyr.
Ulttyq banktiń derekteri boiynsha 2019-2020 jyldar arasynda qolma-qol aqshasyz tranzaktsiialardyń sany 2,4 eseden astamǵa ósip, 35,3 trln. teńgege jetken. Al tólem kartalaryn paidalana otyryp qolma-qol aqsha alý kólemi sońǵy 5 jylda 89,6% -dan 32,6% -ǵa deiin tómendegen.
«Jedel aýdarymdardyń engizilýimen bank sektory jeke tulǵalardyń mobildi qarjylyq operatsiialarǵa qol jetimdiligin jaqsartty jáne keńeitti. Sonymen qatar, tek jeke tulǵalar arasyndaǵy tranzaktsiialarǵa arnalǵan jedel aýdarymdar kásipkerlik qyzmette keńinen qoldanyla bastady. Bul banktik qyzmet naqty ainalymdardy jasyrýǵa múmkindik beretin jáne kóleńkeli ainalymdardyń damýyna yqpal etetin qural retinde qoldanylady», - deidi Erulan Jamaýbaev.
Ministr pandemiia kezinde otandyq biznes qoldaýsyz qalmaǵanyn da eske salady. Memleket tarapynan shamamen 1,2 mln mikro jáne shaǵyn biznes nysandary úsh jylǵa tabys salyǵynan tóleýden bosatylǵan. Olardy tekserýge de úsh jyldyq moratorii jariialanǵan.
«Moratoriidi paidalanyp keibir josyqsyz kásipkerler kassalyq chek bermeýdi ádetke ainaldyrǵan. 2020 jyly tutynýshylardan osy mándegi 17 myńnan astam shaǵym tústi. Salyq eseptilikterinde ainalymdar kórsetilmeidi, qyzmet nemese taýar aqysynyń tólemi biznes sýbektileri retinde tirkelmegen úshinshi tulǵalardyń atyna kelip túsedi. Saldarynan Salyq kodeksiniń, «Tutynýshylardyń quqyqtaryn qorǵaý týraly» Zańnyń jáne Azamattyq kodekstiń normalary buzylady», - delingen ministrdiń jaýabynda.
Vedomstvo basshysy kásipkerlik qyzmetpen bailanysty tólemderdi ashyq etý baǵytynda, Kaspi bank usynǵan tájiribeni mysalǵa keltirgen.
«Kaspi bank aktsionerlik qoǵamy jeke kásipkerlerge arnalǵan Kaspi pay mobildi qosymshasyn ázirledi. Onda satyp alýshylar qoldanystaǵy Kaspi qosymshasy arqyly QR kodty skanerleý arqyly tólem júrgizedi. Ótken jyldyń qyrkúieginen bastap 2021 jyldyń 30 naýryzyna deiin belsendi seriktester sany 62 myń kásipkerge jetti. Oǵan naýryzda 11 myńnan astam jeke kásipker qosyldy. Tranzaktsiia kólemi 65 mlrd teńgege nemese aptasyna 15 mlrd teńgege jetti», - deidi Erulan Jamaýbaev.
Ministr atalǵan ózgeristerdiń bárin biznes pen tutynýshylarǵa aýyrtpalyqsyz engizý úshin túzetýler men olardy iske asyrý merzimin mindetti túrde biznes ókilderimen kelise otyryp beketitnderin atap ótti.
