QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev mobildi internetpen qamtamasyz etiletin 1 myńnan astam aýyldyń kestesi bekitilgenin málimdedi, dep habarlaidy QazAqparat.
«Tsifrlandyrý negizi retinde internetti jappai engizý jumysy jalǵasyp keledi. Internet infraqurylymyn damytý - Nur Otan partiiasynyń sailaýaldy tuǵyrnamasynyń mindetteriniń biri. Qazirgi ýaqytta 117 qala jáne 3 324 aýyl keń jolaqty internetpen qamtylǵan. Onyń ishinde 3169 (95,3 paiyzy) aýylǵa 3G jáne 4G mobildi keń jolaqty internet tartylǵan. 2020 jyldyń sońyna deiin halyq sany 250 adamnan asatyn 1 myńnan astam aýyldy mobildi internetpen qamtamasyz etý kestesi bekitildi», - dedi Asqar Jumaǵaliev QR Tsifrlyq damý, innovatsiialar jáne aeroǵarysh ónerkásibi ministrliginiń keńeitilgen alqa májilisinde.
Ministrdiń sózine sensek, ótken jyly 500-ge jýyq aýyl keń jolaqty internetke qosylǵan.
«Bul jumysty biyl aiaqtaý qajet. Sebebi internetsiz tsifrlandyrý óńirlerge kelmeidi. Jer ústi kommýnikatsiialarmen internet júrgizý - ekonomikalyq turǵydan tiimsiz jáne tutynýshylar úshin qymbat bolýyna bailanysty biz jerserikter arqyly, onyń ishinde One Web jahandyq jobasy aiasynda jumys júrgizemiz. Ótken jyly biz birqatar kezdesý ótkizdik. Belgili bir kelisimge keldik. Qazirdiń ózinde birinshi spýtnik iske qosyldy», - dedi ol.
