«Áleýmettik meditsinalyq saqtandyrý qory» KEAQ Nur-Sultan qalasy boiynsha filialy jyl basynan beri memlekettik tapsyrys boiynsha kórsetilgen qyzmetter úshin elordalyq meditsina uiymdaryna 75,8 mrd teńge tóledi. Bul týraly atalǵan uiymnyń baspasóz qyzmeti habarlady.
Málimetke sai, qarjy tegin meditsinalyq kepildendirilgen kómek kóleminde (TMKKK) bólingen.
«2019 jyldyń 22 qazanyndaǵy málimetter boiynsha, Qormen kelisimshart jasaǵan qaladaǵy meditsinalyq qyzmet kórsetýshi uiymdarǵa 75,8 mlrd teńge tólendi. Bul jalpy kepildendirilgen meditsinalyq kómek paketi sheńberinde bekitilgen kelisimshart somasynyń 74,7 paiyzyn quraidy. Jumys kestege sai júrip jatyr. Bólingen qarajat meditsina mekemeleriniń operatsiialyq shyǵyndaryn óteýge jetkilikti», - deidi ÁMSQ Nur-Sultan qalasy boiynsha filialynyń direktory Nurlybek Qabdyqaparov.
2019 jyly MSQ kepildendirilgen kómek túrlerin kórsetý úshin elordamyzdyń meditsina uiymdarymen jasalǵan kelisimsharttardyń jalpy somasy 101,5 mlrd teńgeni quraidy. Bul 2018 jyly bólingen (90,3 mlrd) qarjydan 11 paiyzǵa artyq.
Biyl Qordyń Nur-Sultan qalasy boiynsha filialy tegin meditsinalyq kepildendirilgen kómek aiasynda meditsinalyq kómek kórsetýge 106 meditsinalyq qyzmet jetkizýshimen 146 kelisimshart jasaldy. Olardyń ishinde jeke menshik klinika da bar, Biyl olardyń sany 2018 jylmen salystyrǵanda 34 %-ǵa artqan.
Esterińizge sala ketsek, Meditsinalyq saqtandyrý qory 2018 jyldan bastap tegin meditsinalyq kómektiń kepildik berilgen kólemi (TMKKK) jáne mindetti áleýmettik meditsinalyq saqtandyrý (MÁMS) paketteri boiynsha úkimet belgilegen sheńberde turǵyndar úshin qyzmetterdi satyp alýshy qarjy operatory bolyp tabylady. Iaǵni, halyqqa kórsetiletin meditsinalyq qyzmet sapasy – qor baqylaýynda.
