QR Qarjy ministrliginiń Memlekettik kirister komiteti turǵyn úidi jalǵa beretin tulǵalarǵa salyq mindettemelerin oryndaý qajettigin eskertti, dep habarlaidy QazAqparat.
Vedomstvo málimetinshe, jeke kásipker (budan ári - JK) retinde tirkelmegen jalǵa berýshiler salyq mindettemelerin biryńǵai jiyntyq tólemdi (budan ári - BJT) tóleý jolymen nemese jeke tabys salyǵy boiynsha deklaratsiiany (budan ári - JTS) usyný jolymen oryndai alady. Jeke kásiper turǵyn úidi jalǵa berý kezinde biýdjetpen esep aiyrysý kezinde patent nemese ońailatylǵan deklaratsiia negizinde arnaýly salyq rejimin (budan ári - ASR) paidalanýǵa quqyly.
Bul rette ádisterdiń árqaisysynyń ózindik artyqshylyqtary men shekteýleri bar. Atap aitqanda, turǵyn úidi jalǵa beretin jáne jeke kásipker retinde tirkelmegen tulǵalar jyl saiyn esepti salyq kezeńinen keiingi jyldyń 31 naýryzynan keshiktirilmeitin merzimde jeke tabys salyǵy boiynsha deklaratsiiany (240.00-nysan) tabys etedi. Deklaratsiiany tapsyrý úshin belgilengen merzimnen keiin kúntizbelik on kúnnen keshiktirilmeitin merzimde alynǵan tabystyń 10 paiyz mólsherinde jeke tabys salyǵyn tóleidi.
Jeke tulǵalar jeke tabys salyǵy boiynsha deklaratsiiany (240.00-nysan) «E-Salyq Azamat» mobildi qosymshasy nemese cabinet.salyk.kz web-portalynda Salyq tóleýshiniń kabineti arqyly tapsyra alady. Eger turǵyn úi salyq agentine (jeke kásipker, jeke praktikamen ainalysatyn tulǵa, zańdy tulǵa, onyń qurylymdyq bólimsheleri, rezident emes zańdy tulǵa) jalǵa berilgen jaǵdaida jeke tabys salyǵyn esepteýdi, ustap qalýdy jáne biýdjetke tóleýdi salyq agenti tólem kózinen júzege asyrady.
Jeke tulǵalar salyq mindettemelerin respýblikalyq jáne oblystyq mańyzy bar qalalardyń, astananyń turǵyndary úshin 1 AEK jáne qalǵan eldi mekenderdiń turǵyndary úshin 0,5 AEK mólsherinde biryńǵai jiyntyq tólem tóleý arqyly júzege asyra alady. Mundai jeke tulǵalar tólem júrgizilgen kúnnen bastap tólem júrgizilgen aidyń sońǵy kúnine deiin biryńǵai jiyntyq tólem tóleýshiler dep tanylatyn bolady. Bul rette biryńǵai jiyntyq tólem tóleýshiniń kúntizbelik jyl ishindegi tabys mólsheri 1 175 eselengen AEK-ten aspaýy tiis.
Patent nemese ońailatylǵan deklaratsiia negizinde arnaýly salyq rejimin qoldanatyn jeke kásipker tiisinshe alynǵan kiristiń 1 nemese 3 paiyz mólsherlemesi boiynsha jeke tabys salyǵyn (2023 jylǵa deiin jeke tabys salyǵyn tóleýden bosatylǵan) esepteidi. Sondai-aq «Mindetti áleýmettik saqtandyrý týraly», «Zeinetaqymen qamsyzdandyrý týraly» jáne «Mindetti áleýmettik meditsinalyq saqtandyrý týraly» zańdarda belgilengen mólsherlemeler boiynsha áleýmettik tólemderdi (áleýmettik aýdarymdar, mindetti zeinetaqy jarnalary, MÁMS jarnalary men aýdarymdary) tóleidi.
«Ákimshilik quqyq buzýshylyq týraly» QR Kodeksiniń 272 jáne 275-baptaryna sáikes salyq eseptiligin usynbaý, sondai-aq salyq salý obektilerin jáne salyq eseptiliginde kórsetilýge jatatyn ózge de múlikti jasyrý ákimshilik jazaǵa, onyń ishinde aqshalai aiyppul túrinde óndirip alýǵa ákep soǵady», - dep eskertedi komitetten.
