Saiasattanýshy, Ulttyq senim keńesiniń múshesi Erlan Sairov beibit jinalystar týraly zań jobasyn talqylaý - azamattar men biliktiń qarym-qatynasynyń jańa modelin jasaidy, dep habarlaidy QazAqparat.
Erlan Sairov «Qazaqstan Respýblikasyndaǵy beibit jinalystar, mitingter, sherýler, piketter men demonstratsiialar uiymdastyrý jáne ótkizý tártibi týraly» zań jobasyna qatysty synǵa toqtalyp ótti.
«Syn elimizdiń qoǵamdyq ómiriniń bir bóligine ainalýy kerek ekenin túsinýimiz kerek. Biz oǵan úirenip, ony qabyldaýymyz qajet. Syn buryn da bolǵan, qazir de bar jáne bola da beredi. Meniń oiymsha, búgingi tańda zań jobasyn talqylaýdyń ózi azamattar men biliktiń qarym-qatynasynyń jańa modelin jasaidy», - dedi Erlan Sairov elordada zań jobasyn talqylaý barysynda.
Ol Memleket basshysy Twitter paraqshasynda zań jobasy boiynsha óz pikirin bildirgeni týraly aitty.
«Memleket basshysy keshe ǵana Twitter paraqshasynda zań jobasy boiynsha óz pikirin bildirdi. Bul óte mańyzdy. Zań jobasyn azamattar ǵana emes, Memleket basshysy da talqylaitynyn kórip otyrmyz. Buz zań bizdiń kóz aldymyzda ózgerip, jańa sipatqa ie bolyp jatyr dep sanaimyn.
Meniń oiymsha, bizde habarlandyrý júiesiniń printsipin tolyq qamtamasyz etetin zań bolady», - deidi Erlan Sairov.
Sondai-aq, ol beibit sherýge qatysýshylar sanyna toqtaldy.
«Talqylaýǵa qatysatyndarǵa «Mitingke 251 adam kelse ne bolady?« degen suraq qoiamyn. Mundai suraqtarǵa belgili bir jaýaptarymyz bolýy kerek. Zań boiynsha qatysýshylar sany artyp ketse, miting toqtatylýy kerek. Bul máseleni jan-jaqty jetildirip, qatysýshylar sanyna qatysty oilanýymyz kerek», - degen pikir bildirdi saiasattanýshy.
