Ózbekstan koronavirýsqa qarsy vaktsinatsiia sertifikattaryn taný boiynsha Ortalyq Aziia elderiniń biryńǵai aqparattyq júiesin iske qosýdy usyndy. Bul týraly Túrikmenstanda ótken OA elderi basshylarynyń Konsýltativtik keńesinde Ózbekstan Respýblikasynyń Prezidenti Shavkat Mirziioev málim etti, dep habarlaidy "Ult aqparat".
Shavkat Mirziioev Ortalyq Aziia óńiri elderin pandemiiamen kúreste tyǵyz úilestirý jáne ózara kómek kórsetý máselesin talqylaý barysynda birqatar bastamany atap ótti.
«Testileý nátijeleri men vaktsinatsiia sertifikattaryn taný boiynsha biryńǵai aqparattyq júieni iske qosýdy, infektsiialyq aýrýlardyń aldyn alý, diagnostikalaý jáne emdeý, meditsina qyzmetkerlerin daiarlaý salasynda tájiribe almasýdy keńeitýdi, farmakologiia salasynda ǵylymi yntymaqtastyqty jáne ómirlik mańyzy bar dárilik preparattardy óndirý boiynsha kooperatsiiany jolǵa qoiýdy usynamyz», – dedi Ózbekstan Prezidenti.
Túrikmenstan Prezidenti Gýrbangýly Berdimuhamedovtiń tóraǵalyǵymen ótken sammitke Qazaqstan Respýblikasynyń Prezidenti Qasym-Jomart Toqaev, Ózbekstan Respýblikasynyń Prezidenti Shavkat Mirziioev, Qyrǵyz Respýblikasynyń Prezidenti Sadyr Japarov, Tájikstan Respýblikasynyń Prezidenti Emomali Rahmon, sondai-aq BUU Bas hatshysynyń Ortalyq Aziia boiynsha arnaiy ókili, Ortalyq Aziia úshin preventivtik diplomatiia jónindegi óńirlik ortalyqtyń basshysy Natalia German qatysty.
