Ózbekstan prezidenti Shavkat Mirziioev Qaraqalpaqstannyń egemen mártebesin saqtaý qajettigin málimdedi. Bir kún buryn Qaraqalpaqstan astanasy Núkis pen respýblikanyń ózge qalalarynda jappai narazylyq tutanǵan bolatyn.
Ózbekstan prezidentiniń baspasóz qyzmetiniń málimetine sáikes, 2 shildede Núkis qalasyna kelgen Mirziioev respýblikanyń joǵarǵy organ ókilderimen, aqsaqaldar alqasy múshelerimen kezdesken.
"Konstitýtsiiaǵa enetin ózgertýler men tolyqtyrýlardy talqylaý protsesi jalǵasyp jatqandyqtan jáne Qaraqalpaqstan turǵyndarynyń pikirin eskere otyryp, prezident Ózbekstan Respýblikasy Konstitýtsiiasynyń 70, 71, 72, 74, 75 baptaryn ózgerissiz qaldyrý qajettigin atap ótti" dep jazylǵan prezidenttiń baspasóz qyzmetiniń habarlamasynda.
Másele Qaraqalpaqstannyń mártebesine qatysty baptar týraly bolyp otyr. Negizgi zańnyń qazirgi nusqasyna sáikes, Qaraqalpaqstannyń egemen mártebesi bar jáne ol jalpyhalyqtyq referendým ótkizý arqyly Ózbekstan quramynan shyǵý quqyǵyna ie. Ótken apta sońynda talqylaýǵa shyǵarylǵan Konstitýtsiia jobasynda Qaraqalpaqstan sývereniteti men onyń Ózbekstannan bólinip shyǵý quqyǵy týraly normalar alynyp tastalǵan bolatyn. Bul Qaraqalpaqstan halqynyń ashý-yzasyn týǵyzyp, sońy jappai narazylyqqa ulasqan edi.
1 shilde kúngi Núkistegi mitingige myńdaǵan adam qatysqan. Aqparatqa qaraǵanda, narazylyq kúshpen basylǵan. Qaraqalpaqstan biligi "tártipsizdik", "memlekettik organdardy kúshpen basyp alý talpynysy" bolǵanyn aityp, "syrtqy kúshterdiń jaǵdaiǵa yqpal etýge tyrysqanyn" málimdedi. Biliktiń aitýynsha, militsiiaǵa qarsylyq kórsetkender ustalǵan. Alaida naqty qansha adamnyń ustalǵanyn ashyp aitpady. "Syrtqy kúshter" dep kimdi meńzegenin de naqtylamady.
Aqparatqa qaraǵanda, Qaraqalpaqstan qalalarynda narazylyq 2 shildede de jalǵasqan. Respýblikada internet bailanysy nasharlap, kei jerlerde múlde óshirilgen.
Narazylyq tutanǵan shaqta Ózbekstan Qazaqstannyń Mańǵystaý oblysymen shektesetin ótkizý beketin japty. Resmi túrde bul qadam "aqparattyq júieniń isten shyǵýymen" bailanystyryldy. Qazaqstan UQK Qaraqalpaqstan – Beineý (Mańǵystaý stantsiiasy) baǵyty boiynsha temir jol qatynasyn toqtatý da josparlanyp otyrǵanyn málimdedi.
Aita keteiik, Qaraqalpaqstan Qazaqstannyń Mańǵystaý, Aqtóbe jáne Qyzylorda oblystarymen shektesedi. Ózbekstan aýmaǵynyń 40 paiyzyn alyp jatqan respýblikada eki millionǵa jýyq adam turady, olardyń arasynda qaraqalpaqtar, ózbekter jáne qazaqtar bar. Qaraqalpaq tili túrki tilderdiń ishinde qypshaq tobyna jatady, qazaq tilimen qatty uqsas.
