Jankeldin aýdanynyń Qyzbel aýylynda týǵan qazaqtyń asa kórnekti jazýshysy, aqyn, qoǵam qairatkeri Mirjaqyp Dýlatovqa eskertkish ornatyldy. Biiktigi tórt metr bolatyn eskertkish alash arysynyń esimimen atalatyn mekteptiń aldynan boi kóterdi, - dep habarlaidy "Ult aqparat" "Qostanai tańy" gazetine silteme jasap.
Bul igiliktiń isti Jaqańnyń urpaqtary júzege asyrdy. Baba urpaqtary bunyń syrtynda Bidaiyq aýylyndaǵy M.Dýlatovtyń kesenesi men murajaiyna kúrdeli jóndeý jumystaryn júrgizip bergen. Músindi jasaǵan – osy eldiń týmasy, oblys óńirine belgili músinshi, sýretshi, Qostanai qalasynyń turǵyny Muqash Rahaliev. Bul kisimen júzbe-júz kezdesip, áńgimelesýdiń sáti túspedi. Tek telefon arqyly áńgimelestik. Óziniń aitýy boiynsha, ol buǵan deiin qolónermen ainalysqan eken. Dombyra, qobyz, kúbi, besik, sandyqtar jasap, tutynýshylar tarapynan mol suranysqa ie bolǵan. Sońǵy tórt jyl kóleminde músin jasaýmen shuǵyldanyp, qosymsha kásibiniń arqasynda el alǵysyna bólenip keledi. -Mirjaqyp babamyzdyń músinin jasaý men úshin úlken baqyt dep bilem. Ózim de qarjylai úles qosyp, úsh aidyń ishinde músindi jasap shyqtym. Jasaǵan eńbegime eshqandai eńbekaqy talap etken joqpyn. Sebebi men de osy aýyldyń týmasymyn. Perzenttik boryshymnyń bir bólshegi ótelsin dep, tegin qyzmet ettim. Biyl kúzden qaldyrmai eskertkish, murajai, kesenelerdiń ainalasyna kóshet aǵashtaryn otyrǵyzbaqshymyz.
Sondai-aq, keler jyly babamyzdyń atyndaǵy murajaidyń ishine jóndeý jumystaryn júrgizemiz. Jas býyn osyndai tarihi eskertkishterge taǵzym etip, qazaqtyń rýhyn asqaqtatsa eken deimin, — deidi Muqash Toqtarbaiuly. Eskertkishtiń ashylý saltanatynda sóz alǵan aýyl ákimi Eldos Ediresov Táýelsizdiktiń 25 jyldyq mereitoiy qarsańyndaǵy jasalǵan tamasha tartýǵa rizashylyǵyn jetkizdi. Sonymen qatar, M.Dýlatovtyń urpaqtaryna jáne músinshi M.Toqtarbaiulyna aýyl turǵyndarynyń atynan sheksiz alǵysyn bildirip, qazaqtyń salt-dástúri boiynsha iyqtaryna shapan jaýyp, syi-siiapat jasap, qurmet kórsetti. Baba rýhyna quran baǵyshtalyp, as berildi. Aýyl qariialary M.Dýlatov týraly derekter keltirip, keleli áńgimeler aitty.
