Belarýstiń memlekettik BelTA agenttigi Minskide "jappai tártipsizdikti uiymdastyrǵan" adamdardyń ustalǵanyn habarlady. Militsiianyń boljamyna qaraǵanda, ustalǵandardyń biri – Minsk turǵyny "Belarýs" qonaqúiiniń 17-qabatynan bólme jaldap, sol jerden narazylyqqa "jetekshilik jasap otyrǵan".
BelTA agenttiginiń habarlaýynsha, oǵan úsh adam tike baǵynǵan, ol úsheý óz kezeginde júzdegen adamdy basqarǵan.
Belarýs IIM sonymen birge narazylyq aktsiiasyna qatysýshylarǵa "aqsha taratqan" adamnyń da ustalǵanyn habarlady. Vedomstvo ókilderiniń aitýynsha, onyń riýkzagynan "on myń dollardan astam" aqsha tabylǵan. Ustaý kezinde ol qaýipsizdik kúshterine "qarsylyq kórsetip, biriniń murnyn syndyrǵan".
Buǵan deiin vedomstvo "arandatýshylardyń" da ustalǵanyn habarlaǵan edi. Olardyń arasynda "Otkrytaia Rossiia" uiymynyń úilestirýshileri Igor Rogov jáne Artem Vajenkov bar. Belarýs tergeý komiteti jappai tártipsizdikke qatysý baby boiynsha is qozǵaǵan.
Osyǵan deiin "Otkrytaia Rossiia" tobynyń ókilderi Vajenkov pen Rogov sailaýǵa baqylaýshy retinde kelgenin málimdegen. Olar Belarýske baratynyn jasyrmaǵan bolatyn.
Belarýste 9 tamyzdan beri narazylyq aktsiialary jalǵasyp jatyr. 9 tamyzda ótken Prezident sailaýynyń resmi qorytyndysy boiynsha, qazirgi basshy Aleksandr Lýkashenko sailaýshylardyń 80 paiyz daýysyn alyp, jeńiske jetken. Al onyń basty qarsylasy, oppozitsiia kandidaty Svetlana Tihanovskaiaǵa sailaýshylardyń shamamen 10 paiyzy daýys bergen. Oppozitsiia sailaý nátijesi burmalandy dep málimdedi. Tihanovskaia elden ketip, Litvaǵa barǵan.
Úsh kúnnen beri jalǵasyp jatqan eldegi narazylyqty arnaiy jasaq kúshpen basyp jatyr. Myńdaǵan adam ustalǵan, júzdegen adam zardap shekken. Resmi málimet boiynsha, bir adam qaza bolǵan.
12 tamyzda úsh kúndik "úzilisten" soń Belarýste mobildi internet istei bastady. Minsk internetke "shetelden kibershabýyl jasady" dep málimdedi. Keibir sarapshylar biliktiń ózi internetti buǵattady dep sanaidy.
