QR Saýda jáne integratsiia ministrligi jumyrtqanyń nelikten qymbattaǵanyn túsindirdi, dep habarlaidy "Ult aqparat".
Ministrliktiń baspasóz qyzmeti taratqan aqparattarǵan qaraǵanda, 2021 jyldyń 25 naýryzyndaǵy jaǵdai boiynsha apta saiynǵy statistikalyq derekterge sáikes el óńirlerinde 1-sanattaǵy on jumyrtqanyń baǵasy 340 teńgeden bastap 485 teńgege deiin qubylady. Jyl basynan beri baǵanyń ósýi 11,9%-dy quraidy.
Esterińizge sala keteiik, memleket baǵany rettei alatyn áleýmettik mańyzy bar taýarlardyń tizimine tek 1-sanattaǵy jumyrtqa ǵana jatady. Baǵanyń ósýiniń negizgi sebebi qustardyń 2020 jyly tumaýdan qyrylýy sebep bolyp otyr. Sonyń sldarynan 2020 jyly jumyrtqa óndirisi 8,4%-ǵa qysqardy.
Qazaqstannyń jumyrtqa óndirýshileri qaýymdastyǵynyń derekteri boiynsha tumaý saldarynan 2,6 mln. mekien taýyq qyrylǵan. Baǵanyń ósýiniń ekinshi sebebi – jem-shóptiń qymbattaýy (onyń ishinde jemdik astyq). Jyl boiy jem-shóptiń quny 54.4%-ke ulǵaidy.
«Óńirlerde baǵanyń odan ári ósýine jol bermeý maqsatynda jumyrtqa óndirýshi kompaniialar men saýda obektileri (dúkender, saýda jelileri) arasynda jumyrtqa sórelerine tikelei jetkizý jáne satýdyń tirkelgen baǵasyn qamtamasyz etý týraly memorandýmdar jasalady. Ákimdikter basqa da áleýmettik mańyzy bar taýarlar boiynsha osyndai jumystar júrgizýde», - delingen habarlamada.
