Atalǵan jaǵdai Astanadaǵy test tapsyrý bólimshesinde bolǵan, dep xabarlaidy QazAqparat tilshisi.
Ulttyq testileý ortalyǵynyń basshysy Ramazan Álimqulovtyń aitýynsha, Lev Gýmilev atyndaǵy Eýraziia ulttyq ýniversitetinde bir bala test tapsyrýǵa on uialy telefondy alyp ótpekshi bolǵan. "Biraq atalǵan qurylǵylardyń bári aýditoriiaǵa kirgenge deiin anyqtaldy. Barlyq telefondardy alyp qoidy. Test tapsyrý kezinde ol smartfondy paidalanǵan joq. Endi, respýblika boiynsha uialy telefondy paidalanýdyń biren-saran jaǵdailary bolǵan shyǵar. Alaida eshkimdi aýditoriiadan qýǵan joq. Baqylaýshylar birden eskertý jasap otyrdy", - dedi R.Álimqulov Astanada ótken baspasóz máslixatynda.
Onyń sózine qaraǵanda, ulttyq biryńǵai testileýdiń alǵashqy kúni bir adamnyń test nátijesi joiyldy. "Ol jaǵdai ońtústik óńirde bolǵan. Men atalǵan sheshimniń sebebin aitpai-aq qoiaiyn. Biraq ondai jaǵdailardyń bir ǵana sebebi bar. UBT-ny ótkizý erejeleri buzylǵan jaǵdaida ǵana testtiń nátijesi joiylady. Al mektep túlegin aýditoriiadan shyǵaryp tastaidy", - deidi R.Álimqulov.
Osy oraida ortalyq basshysy keibir test jaýaptarynyń áleýmettik jelide jariialanyp jatqanyna qatysty pikir bildirdi. Onyń aitýynsha, biren-saran jaǵdailar bar. "Biraq bizde mobildik bailanysty óshiretin qurylǵylar istep jatyr. Biyldan bastap barlyq qural-jabdyqtar jańartyldy. Sonyń arqasynda 4G signalyn tolyǵymen basýǵa bolady. Bylaisha aitqanda, mektep túlekteri test tapsyrmalaryn fotoǵa túsirip, jelige jibere almaidy", - dep atap kórsetti R.Álimqulov.
Aita keteiik, búgin QR Bilim jáne ǵylym ministrligi ulttyq biryńǵai testileýdiń alǵashqy kúni boiynsha esep berdi. Oǵan sáikes, eki myńnan astam túlek shekti upaidy jinai almady.
