Búgin Úkimet otyrysynda Saýda jáne integratsiia vitse-ministri Erjan Qazanbaev saýda boiynsha analitikalyq platforma múmkindikteri týraly aitty, dep habarlaidy QazAqparat.
Aita keteiik, Memleket basshysynyń biylǵy 1 qyrkúiektegi Joldaýyn iske asyrý maqsatynda Saýda jáne integratsiia ministrligin áleýmettik mańyzy bar taýarlar baǵasynyń ósýin tejeý máselelerinde biryńǵai úilestirýdi júzege asyratynnegizgi jaýapty memlekettik organ retinde aiqyndaý usynyldy.
«Ministrlik azyq-túlik baǵalaryn turaqtandyrý máseleleri boiynsha salalyq memlekettik organdar men uiymdar arasyndaǵy ózara is-qimyl reglamentiniń jobasyn ázirlep, kelisilgen nusqasy jaqyn arada Úkimetke engiziledi. Azyq-túlik taýarlaryna monitoring pen baǵalardyń neǵurlym sapaly jáne tiimdi júiesin júrgizý maqsatynda ministrliktiń tiisti institýtsionaldyq kúsheitýlerin usynamyz», - dedi vitse-ministr.
Osy bastama aiasynda memlekettik organdardyń:
- shekti baǵalar men saýda ústemeleri mólsheriniń saqtalýyn baqylaý;
taýarlar boiynsha boljamdardy qalyptastyrý;
turaqtandyrý qorlaryna jáne «ainalym shemasyna» qarajatty tiimdi bólý boiynsha usynymdar berý siiaqty fýnktsiialaryn biriktirý qajet.
«Saýda boiynsha analitikalyq platforma quryldy. Platforma onlain rejiminde azyq-túlik baǵalaryna monitoring júrgizýge jáne boljamdy baǵalardy qalyptastyrýǵa múmkindik beredi. Al múddeli memlekettik organdardyń qoldanystaǵy bazalarymen integratsiia júrgize otyryp, platforma baǵanyń ósý sebepteri men olardy turaqtandyrý joldaryn kórýge múmkindik beretin matematikalyq modelderdi qurýǵa múmkindik beredi. Sonymen birge, saýda salasynyń jai-kúiine keshendi taldaý júrgizý, túpkilikti tutynýshyǵa deiin búkil tizbek boiynsha taýarlarǵa baǵa belgileý úrdisterin anyqtaý múmkin bolady. Bul jumys Úkimettiń tsifrlyq keńsesi aiasynda júrgiziledi. Osy platformaǵa ákimdikterdiń ahýaldyq ortalyqtary da qosylatyn bolady, bul árbir óńirdegi baǵa boiynsha jaǵdaidy jedel rejimde monitoringteýge múmkindik beredi», - dedi Erjan Qazanbaev.
