Bilim jáne ǵylym ministrligi túlekterdiń qorytyndy attestattaý emtihandary 28 mamyrda bastalatynyn habarlady.
Buǵan deiin májilis depýtaty Juldyz Súleimenova úkimetten koronavirýsqa bailanysty mektepterde emtihan men sońǵy qońyraý sharasyn ótkizbeýdi surady. Ol qorytyndy baǵany byltyrǵydai oqý jylynyń toqsandyq baǵalary boiynsha shyǵarýdy usynǵan edi.
Alaida bilim ministrliginiń baspasóz qyzmeti qorytyndy attestattaýǵa qatysty jospar ózgermeitinin, mektepterde emtihan ótkiziletinin málimdedi.
"9 (10) synyp oqýshylarynyń qorytyndy bitirý emtihandary 2021 jyly 28 mamyr men 5 maýsym aralyǵynda ótedi", - dedi baspasóz qyzmetindegiler.
Qorytyndy attestattaý úsh pán boiynsha ótedi:
- oqytý tili boiynsha esse túrinde jazbasha emtihan;
- matematikadan (algebradan) jazbasha emtihan;
- ózge tilderde oqityn synyptarda qazaq tili men ádebietinen jazbasha emtihan;
- qazaq tilinde oqytatyn synyptardaǵy orys tili men ádebietinen jazbasha emtihan.
11 (12) synyp oqýshylarynyń memlekettik bitirý emtihandary 1-10 maýsym aralyǵynda ótedi.
Túlekter tórt pán boiynsha emtihan tapsyrady:
- oqytý tili boiynsha esse túrinde jazbasha emtihan;
- algebra jáne analiz bastamalary páninen jazbasha emtihan;
- Qazaqstan tarihynan testileý;
- ózge tilderde oqytatyn mektepterde qazaq tilinen jáne qazaq tilinde oqytatyn mektepterde orys tilinen testileý.
Ministrliktiń aqparatynsha, biyl 2020-2021 oqý jylyn 3,4 millionnan astam oqýshy aiaqtap jatyr. Onyń ishinde 150 myńǵa jýyǵy — 11 (12)-synyp túlekteri, 270 myńǵa jýyǵy — 9-synyp oqýshylary.
