Sonymen qatar, ministrlik Samruk-Kazyna Construction AQ-men birlesip, importty almastyratyn 35 joba iriktep alǵan.
"Jobalardy iske asyrý santehkeramika, jylý oqshaýlaǵysh materialdar, bólmeler arasyndaǵy esikter, DSP, shyny, keramikalyq plitkalar, eden jabyndary jáne basqa da suranysqa ie qurylys materialdary sanatyndaǵy import úlesin tómendetýge múmkindik beredi", - delingen habarlamada.
Sondai-aq, ministrlik biýdjet qarajaty esebinen salynyp jatqan nysan qurylysynyń qymbattaýynyń aldyn alý úshin qadamdar jasaǵan. Máselen, qurylys resýrstary qunynyń eleýli aýytqýyna jedel den qoiý maqsatynda vedomstvo qurylys materialdarynyń ózekti smetalyq baǵalarynyń jinaqtary shyǵarylyp jatyr. Bul biýdjettik nysandardyń aiaqtalmaǵan qurylys kóleminiń ulǵaiyp ketý táýekelin tómendetýge múmkindik beredi.
Qazaqstanda memlekettik investitsiialar esebinen salynyp jatqan 286 nysannyń qurylysy toqtatylǵany aityldy. 84 jaǵdai boiynsha qurylys jumystary jobalardyń qymbattaýyna bailanysty toqtap qalǵany anyqtaldy.
"Qurylys salasyn turaqty monitoringileý nysandardy qarjylandyrý kezinde jergilikti atqarýshy organdardyń júiesiz is-qimyly osyndai qymbattaýdyń birden bir sebebi sanalatynyn kórsetedi. Bir nysandy aiaqtamai, olar taǵy birneshe jobany júzege asyrýǵa kirisedi jáne osy qarajat sheginde qurylystyń aiaqtalý merzimin uzartady. Bul merdigerlerdiń óz mindettemesin tolyqtai oryndamai, qurylys jumystarynyń toqtaýyna ákep soǵady. Byltyr qurylys resýrstary qunynyń ósýine bailanysty óńirlerdiń ákimdikteri 641 joba boiynsha qurylys qunyn túzetý boiynsha ótinish bildirgen", - dedi vedomstvo ókilderi.
Osyǵan bailanysty IIDM Qarjy ministrligine qarjylandyrý merzimderin oryndaý bóliginde jaýapkershilik sharalaryn qatańdatýdy, sondai-aq jobalardy túzetýdi jeńildetý bóliginde memlekettik aýdit júrgizý merzimderin naqtylaýdy usynǵan.
Qabyldanyp jatqan sharalar eldegi turǵyn úi jáne ónerkásip qurylysynyń qarqynyn tómendetpeýge múmkindik beredi.
2022 jyly 15,1 million sharshy metr jańa turǵyn úi salý josparlanǵan. 2022 jyldyń 2 aiynda 1,8 million sharshy metr turǵyn úi paidalanýǵa berilgen. 2021 jyldyń uqsas kezeńimen salystyrǵanda 13 óńirde turǵyn úidi paidalanýǵa berý kóleminiń ulǵaiýy baiqalady. Eń joǵary ósim baiqalatyn óńirler: Pavlodar (191,1 paiyz), Soltústik Qazaqstan (146,3 paiyz), Túrkistan (139,5 paiyz), Almaty (125,2 paiyz) jáne Aqmola (113,8 paiyz) oblystarynda, sondai-aq Almaty qalasy (110,5 paiyz). 2022 jyly turǵyn úi qurylysy salasyna 2,4 trillion teńge investitsiialar tartý josparlanyp otyr.
