sýret ashyq derekkózden alyndy
Qazaqstannyń ekologiia jáne tabiǵi resýrstar ministrligi Kaspii teńizinde itbalyqtardyń ólimine qatysty túsinikteme berdi.
"2023 jyly 6 mamyrda jergilikti ýaqyt saǵat 19:00 shamasyndaǵy túsken aqparat boiynsha Jaiyq-Kaspii oblysaralyq basseindik balyq sharýashylyǵy inspektsiiasy Mańǵystaý oblysy boiynsha balyq inspektsiiasy basqarmasynyń memlekettik inspektorlary monitoring júrgizý barysynda Túpqaraǵan aýdany, Baýtino aýyly, Kaspii teńizi jaǵalaýynan 15 dana itbalyq jáne 4 dana bekire balyǵynyń ólekselerin tapty", - dep jazylǵan ministrliktiń áleýmettik jelidegi resmi paraqshasynda.
Resmi aqparatqa sáikes, qoldanystaǵy ózara is-qimyl josparyna sáikes jumys tobynyń barlyq músheleri osy jaǵdai týraly jedel túrde habardar etildi. Sonymen qatar atalǵan derek boiynsha Mańǵystaý oblysy Túpqaraǵan aýdanynyń politsiia bólimine habarlanyp, qylmystyq is qozǵaldy. Onyń sheńberinde janýarlardyń óliminiń sebepteri men basqa da mán-jailary anyqtalady.
Itbalyqtar tabylǵan jerge Jaiyq-Kaspii oblysaralyq balyq sharýashylyǵy basseindik inspektsiiasymen Mańǵystaý oblysy boiynsha ekologiia departamentiniń, veterinariialyq inspektsiianyń, Qazgidromettiń jáne jergilikti atqarýshy organdardyń ókilderi jetip, Mańǵystaý oblysy boiynsha ekologiia departamenti óli itbalyqtar tabylǵan jerden sý men aýa synamalaryn aldy.
Biraq ólekselerdiń ydyraý deńgeii joǵarǵy dárejede bolǵandyqtan, gistologiialyq synama alý múmkin bolmady. Degenmen Jaiyq-Kaspii oblysaralyq basseindik balyq sharýashylyǵy inspektsiiasynyń qyzmetkerleri Kaspii teńiziniń jaǵalaý aimaǵynyń monitoringin jalǵastyryp jatyr.
Eske salsaq, Fort-Shevchenko mańyndaǵy jaǵalaýda itbalyqtardyń, aqúrpekterdiń jáne Qyzyl kitapqa engen balyqtardyń ólekseleri anyqtaldy. Bul jaǵdaidy dostarymen birge jaǵalaýǵa demalýǵa shyqqan jergilikti áýesqoi balyqshy videoǵa túsirip alǵan.
