Foto: Tengrinews.kz/Sviatoslav Antonov©
Jelide áskerde qysym kórgenin aitqan qyzdyń jazbalary taraǵan bolatyn. Arnaiy komissiia osy iske qatysty tekseristi aiaqtady, - dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Ministr tapsyrmasyna sáikes qurylǵan arnaiy komissiia kelisimshart boiynsha áskeri qyzmetshi A.B. Elshibaevanyń Qarýly kúshter qatarynan zańsyz shyǵarylýy jáne batalon komandiri tarapynan oǵan oǵash qylyq kórsetýi týraly áleýmettik jelide jariialanǵan jazbaǵa qatysty qosymsha tekserýdi aiaqtaǵan.
"Qorǵanys ministrliginiń komissiiasy azamatsha A.B. Elshibaevanyń aitqan tujyrymy men aiǵaqtaryn qaitadan muqiiat zerdeledi. Jan-jaqty tekseris nátijesinde Elshibaevanyń aryzynda kórsetilgen faktiler qujatpen rastalmaǵanyn jáne shyndyqqa janaspaitynyn anyqtady.
Buǵan deiin, 2022 jyldyń 6 mamyrynda Qonaev garnizonynyń Áskeri politsiia bólimi atalǵan áskeri qyzmetshiniń jazbasha ótinishi boiynsha tekserý jumystaryn júrgizgen. Batalonnyń barlyq jeke quramy A.B. Elshibaevaǵa qatysty 54179 áskeri bóliminiń laýazymdy tulǵalary tarapynan zańsyz is-áreket faktileriniń bolǵanyn rastamady" - delingen habarlamada.
Jańa komissiia jumysynyń nátijeleri jáne Qonaev garnizonynyń Áskeri politsiia bólimi jinaǵan materialdardy qaraý, sondai-aq 54179 áskeri bólimi qyzmetshileriniń túsindirmelerin taldaý boiynsha da azamatsha A.B.Elshibaeva usynǵan aiyptaýlar rastalmaǵan.
Aita ketý kerek, burynǵy áskeri qyzmetshi qyzmet atqarý barysynda batalon qolbasshylyǵy tarapynan birneshe márte eskertý alǵan jáne áskeri bólimniń aýmaǵyna uialy telefondy zańsyz alyp kirgeni úshin tártiptik jaýapkershilikke tartylǵan.
Vedomstvo málimetinshe, biyl 3 mamyrda attestattaý komissiiasynyń sheshimine sáikes A.B. Elshibaeva jaýyngerlik daiarlyq baǵdarlamasyn tómen meńgergeni jáne tártipti buzǵany úshin QR Qarýly Kúshteri qatarynan teris piǵyly boiynsha shyǵarylǵan.
Sonymen qatar, ministrlik Qazaqstan Respýblikasynyń qoldanystaǵy zańyna sáikes A.B. Elshibaeva attestattaý komissiiasynyń qorytyndysymen kelispegen jaǵdaida sot organdaryna júginýge quqyly ekenin málimdedi.
