Ulttyq ekonomika ministrligi Qazaqstannyń 2022–2026 jyldarǵa arnalǵan áleýmettik-ekonomikalyq damý boljamyn usyndy, dep habarlaidy Sputnik Qazaqstan.
Syrtqy jáne ishki jaǵdailarǵa bailanysty Qazaqstan ekonomikasyn damytýdyń 2022-2026 jyldarǵa arnalǵan bazalyq, optimistik jáne pessimistik stsenariileri ázirlendi.
Bazalyq stsenarii
Bazalyq stsenarii kezinde munai baǵasy barreline 60 dollardy, al dollar baǵamy 425 teńgeni quraidy.
2022–2026 jyldar aralyǵynda JIÓ-niń ortasha jyldyq ósimi 4,8% deńgeiinde kútilýde. 2022 jyly jalpy ishki ónimniń naqty ósimi 3,9% deńgeiinde, 2026 jyly 5,2 paiyzǵa deiin jedeldeidi.
2022 jyly munai óndirý 87,9 million tonnany qurap, 2026 jyly 107,4 million tonnaǵa deiin ulǵaiady.
"Barlyq bazalyq salada oń ósim kútilýde. Negiz retinde biýdjetti josparlaý úshin bazalyq stsenariidi paidalaný usynylady", - dedi ulttyq ekonomika ministri Áset Erǵaliev úkimet otyrysynda.
Optimistik stsenarii
Optimistik stsenarii kezinde munai baǵasy barreline 70 dollar bolsa, dollar baǵamy – 415 teńge.
2022-2026 jyldar aralyǵynda eldiń jalpy ishki óniminiń ortasha jyldyq ósimi 5% deńgeiinde boljanyp otyr. 2022 jyly ekonomikanyń naqty ósimi – 4,1%, 2026 jyly 5,3%-ke deiin údeidi.
Pessimistik stsenarii
Pessimistik stsenarii oryndalsa, munai baǵasy barreline 50 dollar, al dollar baǵamy 435 teńgege jetedi.
Aldaǵy bes jylda eldiń JIÓ ortasha ósimi 4,6% deńgeiinde boljanýda. 2022 jyly ekonomikanyń naqty ósimi 3,7%, al 2026 jyly 4,9%-ke deiin jedeldeidi.
