Foto áleýmettik jeliden alyndy
Syrtqy ister ministrligi AQSh-ta qarýly toppen tóbelesip tanymal bolǵan qazaqstandyqqa qatysty aqparatty jariialady, dep habarlaidy Sputnik Qazaqstan agenttigi.
Ministrliktiń resmi ókili Aibek Smadiiarovtyń aitýynsha, jaraqat alǵan qazaqstandyqpen konsýl bailanysyp otyr.
"AQSh-tyń Maiami qalasynda jergilikti qaraqshylyq top tapansha qoldanyp, sómkesin tartyp alǵan. Onyń aitýynsha, sómkede qujaty men aqshasy bolǵan. Qazirgi kezde quqyq qorǵaý organdary tergeý amaldaryn bastady. Sómkeni urlaǵandardy izdestirip jatyr. Bizdiń konsýl ol azamatty taýyp, onymen habarlasty. Jergilikti quqyq qorǵaý organdarymen de bailanysta. Tóbeles kezinde jeńil jaraqat aldy. Ol em qabyldaýdan bas tartty. Densaýlyǵyna qaýip tónip turǵan joq", - dedi Smadiiarov búgingi brifingte.
Onyń sózine qaraǵanda, qaraqshylardyń sazaiyn bergen jas jigit tájiribe almasý maqsatynda AQSh-qa eki ailyq kýrsqa Latviiadaǵy aeronavigatsiia institýtynan barǵan. Mamandyǵy – áýe dispetcheri.
