2020 jyldyń jazynda koronavirýs anyqtalǵan Densaýlyq saqtaý ministrliginiń burynǵy basshysy Eljan Birtanov premer-ministr men úkimettiń basqa múshelerine virýs juqtyrmaý úshin jeke sanaviatsiia bortymen ushqan. Bul týraly sotta onyń advokaty Nurlan Beisekeev málimdedi, - dep habarlaidy Tengrinews.kz.
Eljan Birtanov 2020 jyldyń maýsymynda sanaviatsiia bortyn zańsyz paidalanyp, Tarazdan Nur-Sultanǵa ushty degen kúdikke ilingen. Birtanovtyń ókiliniń aitýynsha, eks-ministr osy kezeńde Jambyl oblysyna barǵan jumys tobynyń quramynda bolǵan. Ony premer-ministr Asqar Mamin basqardy.
"Bul sapardyń maqsattarynyń biri Qordai aýdanyna baryp, biologiialyq qaýipsizdik ǴZI jumysymen, zaýyt pen ózge de meditsinalyq mekemelerdiń qurylys barysymen tanysý boldy. Belgilengen reglamentke sáikes jumys toby osy óńirge sapary aiasynda Nur-Sultannan jáne keri qarai aviatsiialyq kólikpen ushýy kerek boldy. Ashyq aqparat kózderinen osy sapar barysynda Birtanov COVID-19 virýsyn juqtyrǵany belgili boldy. Bul diagnozdy 2020 jyldyń 13 maýsymynda Prezident Is Basqarmasynyń meditsinalyq ortalyǵy rastady", - dedi advokat Beisekeev.
Ol Birtanov tekseristen keiin Nur-Sultannyń modýldik infektsiialyq ortalyǵyna jatqyzylǵanyn habarlady. Beisekeevtiń aitýynsha, bul jerde eks-ministrdiń jaǵdaiy nasharlap, aýrýy ekijaqty pnevmoniiaǵa deiin asqyndy. Densaýlyq jaǵdaiynyń nasharlaýyna bailanysty Birtanov Nur-Sultan qalasynyń Ulttyq kardiologiialyq ortalyǵyna jatqyzyldy, onda 2020 jyldyń 23 maýsymyna deiin emdeldi.
"Ókinishke qarai, tergeý organdary bul jaǵdaiǵa jáne basqasyna bastapqydan tiisti baǵa bermegenin atap óteiin. Birtanovtyń jumys tobynyń múshelerimen birge Nur-Sultanǵa oralýǵa quqyǵy bolmady, óitkeni olarǵa virýs juqtyrý qaýpi joǵary boldy, iaǵni premer-ministr men ministrler kabineti múshelerine. Qazaqstan Prezidenti premer-ministrge jáne densaýlyq saqtaý ministrine COVID-19 virýsynyń taralýyn boldyrmaý jónindegi shtabqa basshylyq jasaýdy, el boiynsha jariialanǵan TJ kezeńinde halyqty qoldaýǵa baǵyttalǵan shuǵyl sharalar qabyldaýdy júktegendikten, premer-ministrdiń sol kúrdeli kezeńde COVID-19 juqtyrýy búkil ministrler kabinetiniń jumysy úshin eleýli jáne, múmkin, orny tolmas saldarǵa ákep soqtyrýy múmkin ekenin túsinesiz dep úmittenemin.
Jolaýshylarǵa virýs juqtyrý qaýpi joǵary bolǵandyqtan Birtanov Nur-Sultanǵa ózge kólik quralymen orala almady. Úkimet múshesi retinde jumysyna oralmaýǵa quqyǵy bolmady. Osylaisha, Birtanovty Tarazdan Nur-Sultanǵa sanaviatsiiamen tasymaldaý eldegi qalyptasqan TJ-ǵa bailanysty májbúrli shara boldy", - dedi Nurlan Beisekeev.
Sondai-aq, sanaviatsiiamen tasymaldaý jóninde Birtanovtyń ózi de oiyn aitty. Onyń aitýynsha, aiyptaý aktisinde "tergeýshi eks-ministrde koronavirýs múldem joq degen pikir aitady".
"Tergeýshi mende virýstyq etiologiianyń joǵary yqtimaldyǵy bar túsiniksiz etiologiianyń eki jaqty pnevmoniiasy bolǵanyn jazǵan. Bul qujatta jazylyp turǵan birinshi jalǵan aqparat emes. Jambyl oblysyna kelgende mende shynymen koronavirýsqa uqsas belgiler paida bolǵanyn aitqym keledi. Bul bas aýrýy, dene qyzýynyń kóterilýi jáne basqalary. Men negizgi delegatsiiadan bólek ketip, premer-ministrge eskerttim, qonaqúige baryp test tapsyrdym.
Birinshi test oń, biraq kúmándi boldy. Bul týraly maǵan sanitariia qyzmeti basshysy habarlady. Sondyqtan men qaitadan test tapsyryp, onyń nátijesin Respýblikalyq sanitariialyq zerthananyń qaraýyn ótindim. (...) Bul jaǵdaida meniń qolymda kúmándi nátijeler turdy: "joq" dep ne "iá" deýge kelmeidi. Biraq aýrý belgileri boldy", - dedi Birtanov.
Densaýlyq saqtaý ministrligniń burynǵy basshysy test nátijesin basshysyna habarlaǵanyn aitty.
"Osydan keiin men shynymen sanaviatsiiamen keldim, áýejaida test tapsyryp, jumysqa bardym, keńsede jumysymdy jalǵastyrdym. Men ózimdi nashar sezingendikten, Prezident Is Basqarmasynyń meditsinalyq ortalyǵynan dárigerler brigadasyn shaqyrdym. Bul keshki saǵat 18.30 shamasynda. Olar menen qaita test alyp, dári jazyp berdi. Ókinishke qarai, sol kezde COVID-19 belgileri boldy, biraq ol rastaý joq edi. Kelesi kúni tańerteń test nátijeleri oń bolyp, meni aýrýhanaǵa alyp ketti", - dedi Eljan Birtanov.
