© Sputnik / Abzal Kaliev
Eńbek jáne halyqty áleýmettik qorǵaý ministri Tamara Dúisenova zeinetaqy jinaǵynyń jetkilikti shegin tómendetý máselesi jumys tobynda qaralatynyn málimdedi, dep habarlaidy Sputnik Qazaqstan.
"Men mundai pikirdi estidim. Bul másele boiynsha qazir jumys toby Ulttyq bankpen, Qarjy naryǵyn damytý jáne retteý agenttigimen birge jumys istep jatyr. Sondyqtan biz muny jumys tobynda qaraityn shyǵarmyz", - dedi Dúisenova Úkimet kýlýarynda.
Buǵan deiin Májilis depýtaty Amanjan Jamalov Úkimetke zeinetaqy jinaǵyn paidalanýǵa múmkindik beretin jetkilikti shekti tómendetýdi usynǵan bolatyn. Májilismenniń pikirinshe, "jetkilikti shektiń mólsheri kóterilgennen keiin, álemde balamasy joq bul bastamanyń máni joǵalyp ketti".
Alaida Ulttyq ekonomika ministri Álibek Qýantyrov jetkilikti shekti tómendetý tiimsiz dep sanaidy. Sheneýnik depýtattyń usynysyna qarsy ekenin, tipti bul másele Úkimette talqylanbaitynyn málimdedi.
Eske salsaq, biyl 1 sáýirden bastap zeinetaqy jinaǵynyń jetkilikti shegi kúrt ósti. Eger byltyr 35 jastaǵy azamattar úshin shekti kórsetkish 2 940 000 teńge bolsa, 2022 jyly ol 5 060 000 teńgeni qurap otyr.
Aita keteri, zeinetaqy jinaǵynyń bir bóligin merziminen buryn alǵysy keletin azamattyń shottaǵy qarjysy eń tómengi jetkilikti shekten asýy kerek. Shekti mejeden asqan aqshanyń barlyǵyn emdelýge nemese turǵyn úi jaǵdaiyn jaqsartýǵa (mysaly, páter satyp alý nemese úi salý) jumsaýǵa bolady.
