Mektepke úshtildilik júieni engizý baǵytynda «eriktilik qaǵidatyn» belgili bir merzimge engizý joly talqylanyp jatyr. Bul týraly Astanada respýblikadaǵy barlyq bilim basqarmalarynyń ókilderiniń basyn qosqan Erlan Saǵadiev málim etti, dep habarlaidy QazAqparat tilshisi.
«Aǵylshyn tili týraly aitarym... Eń bastysy biz ata-analarmen, mektep direktorlarymen, muǵalimdermen, oqýshylarmen kóp sóilestik. Demek, bizdiń usynysymyz mynadai: 2019 jyly, tipti 2018 jyldan bastap «eriktilik qaǵidatyn» belgili bir merzimge engizsek... Demek, mektep ózi daiyn bolsa, ata-analar ózderi kelisse - marhabat, mektepte aǵylshyn tilinde sabaq bere bersin», - deidi ministr.
Erlan Saǵadiev óz sózinde bul baǵytta ártúrli usynystar talqylanyp jatqanyn atap ótti.
«Ekinshiden, 2019 jyldan bastap aǵylshyn tilinde mindetti túrde oqytylatyn pánder bola ma? Osy suraqqa bailanysty bizge mynadai atap óterlik usynys tústi: «bir ǵana pándi 10-11 synyptarda aǵylshyn tilinde mindetti túrde ótetindei eteiik» degen. Sonda barlyq mektepter joq degende bir pándi, ary ketkende tórt pándi aǵylshyn tilinde oqyta bere alady. Shartty túrde aitar bolsaq, fizika, himiia, IT jáne biologiiany aǵylshyn tilinde oqyǵysy kelse, meili oqyta bersin. Eger qalamasa, ózderi sheshedi. Biraq, bir pándi mindetti túrde qaldyrý kerek», - deidi ol.
Ministr sonymen birge, 2,5 ai boiy talqylap kele jatqan másele - shaǵyn jinaqty mektepterge eriktilik quqyǵyn berý ekenin jetkizdi.
«Olarǵa aǵylshyn tilinde pándi oqytýdyń qajettigi bar ma? 2,5 aidyń ishinde biz ár mekteptiń esigin qaǵyp, osyǵan bailanysty oiyn bilýimiz kerek. Bizdiń zertteýimiz boiynsha ata-analardyń 85 paiyzy osyny qalaidy (aǵylshyn tilinde oqytýdy - avt.) Biz úshtildilik baǵdarlamasy úshin alańdamaimyz. Eriktilik qaǵidaty qanshaǵa sozylatyny - ol tórtinshi suraq. Oǵan eki jarym aidyń ishinde jaýap berý kerek. Sholpan Tańatqyzy (QR BǴM ókili - avt.) talqylaý boiynsha ministrliktiń ustanymyn jetkizgen bolatyn. Men sizderge osy ustanymdy rastaǵym keledi. Biz buny jalpyhalyqtyń talqylaýǵa salamyz», - dep túidi Erlan Saǵadiev.
