QR Aqparat jáne qoǵamdyq damý ministri Aida Balaeva «Ulttyq rýhani jańǵyrý» ulttyq jobasyn qarjylandyrý jumystaryn aitty, dep habarlaidy QazAqparat.
«Kóbisin jobany qarjylandyrý máselesi qyzyqtyryp otyr. Osy oraida ulttyq jobanyń shoǵyrlandyrylǵan biýdjeti 119 mlrd teńgeni qurady. Joba 2025 jylǵa deiin júzege asyrylady», - dedi A. Balaeva Ortalyq kommýnikatsiialar qyzmetinde.
Onyń sózine qaraǵanda, bul somanyń negizgi bóligi respýblikalyq biýdjetten bólinedi, iaǵni 110 mlrd teńge eskerilgen. Al 9 mlrd teńge jergilikti biýdjetten qarastyrylǵan. Baǵyttalatyn ár teńgeni mamandar eseptep, ár joba tyńǵylyqty qarjylyq saraptamadan ótken. Osy jobalardy júzege asyrý barysy únemi turaqty baqylaýda bolady. Sonymen qatar jobany júzege asyrý kezinde investitsiialar da tartylmaq.
«Bul Ulttyq joba aiasynda atqarylatyn kóp jumystyń negizgi baǵyttary ǵana. Joǵaryda aitqanymdai, ony iske asyrý úshin úsh birdei ministrliktiń kúshi jumyldyrylyp, naqty nátijelerge qol jetkizetin bolamyz. Al endi tutastai alǵanda, Joba qoǵamdyq sanany jańǵyrtý men strategiialyq mindetterdi sheshýdegi ýaqyt synaǵyna laiyqty jaýap beretin qujat bolatynyna biz senimdimiz», - dedi vedomstvo basshysy.
