Tótenshe jaǵdaidaǵy Úkimettiń jańa ókilettikteri – qisynsyz áreket emes, qajetti shara. Bul pikirdi Aqparat jáne qoǵamdyq damý ministri Dáýren Abaev bildirdi, dep habarlaidy QazAqparat.
16 naýryzda Memleket basshysy memorgandardyń jedel sheshim qabyldaýyna múmkindik beretin Jarlyqqa qol qoidy.
«Qazir qastandyq teoriiasy úshin yńǵaily ýaqyt emes. Úkimettiń jańa ókilettikteri – qisynsyz ázil nemese artyqshylyqqa ie bolý emes, naǵyz qajetti shara. Tótenshe jaǵdai engizilmei turyp ta, memlekettik organdardyń biýdjetin jáne olardyń baǵdarlamalaryn qarjylandyrý birneshe aiǵa sozylýy múmkin bolǵanyn bilesizder. Biraq qazir bizde ýaqyt joq, másele kúnder men ailar týraly emes, saǵat jóninde bolyp otyr. Sondyqtan biýdjetti neǵurlym jeńildetilgen túrde qalyptastyrý týraly sheshim qabyldandy», - dedi ministr «Habar» telearnasyndaǵy «Ashyq dialog» baǵdarlamasynda.
Ministr Úkimetke azyq-túlik pen basqa da birqatar taýarlarǵa baǵa belgileý ókilettikteri berilgenin atap ótti.
«Munyń bári naryqtyq ekonomika erejelerine sáikes kelmeitinin jaqsy túsinemiz. Biraq ókinishke qarai, qiyn kezderde keibir kásipkerlerdiń halyq suranysy joǵary azyq-túlik pen taýarlardyń baǵasyn kóterýge tyrysyp jatqanyn kóremiz. Tipti, bul taýarlardyń tapshylyǵy da joq», - dedi D. Abaev.
