QR Bilim jáne ǵylym ministri Ashat Aimaǵambetov UBT-ny elektrondy formatta uiymdastyrýǵa qatysty pikir bildirdi, dep habarlaidy "Ult aqparat".
«Bul jaiynda eki jyl boiy aityp júrmiz. Bul qadamǵa ata-analar da, túlekter de daiyn boldy. Jalpy, Ulttyq biryńǵai testileýdiń formaty ózgermedi. Tek ony ótkizý protsedýrasy ǵana ózgerip otyr. Buǵan deiin testileý qaǵaz nusqada tapsyrylyp keldi, iaǵni jaýaptardy boiap otyrýǵa ýaqyt ketetin. Endi biyldan bastap elektrondy UBT-ǵa kóshemiz. Bul turǵyda ońtaily basymdyqtar barshylyq», - dedi ministr Ortalyq kommýnikatsiialar qyzmetinde.
Onyń aitýynsha, bul baǵyttaǵy qadamdar pandemiia kezinde óziniń oń nátijesin beredi.
«Biyl Ulttyq biryńǵai testileý úsh ai boiy ótedi. Úsh aida shaǵyn toptarmen túlekter ózderi úshin yńǵaily ýaqyt pen orynda test tapsyrady. Sonymen qatar, UBT-ny eki márte tapsyrý múmkindigi berilip otyr», - dedi Ashat Aimaǵambetov.
