Foto: © Sputnik / Vladislav Vodnev
Aýa raiynyń qolaisyzdyǵyna qaramastan, búgin Astananyń botanikalyq baǵynda elordanyń meditsinalyq jurtshylyǵy men Dúniejúzilik densaýlyq saqtaý uiymynyń ókili qatysqan Dúniejúzilik densaýlyq saqtaý kúnine arnalǵan júgirý sharasy ótti. Oǵan densaýlyq saqtaý ministri Ajar Ǵiniiat qatysty, - dep habarlaidy Tengrinews.kz saity.
Ministr osydan keiin birden Májiliske "Keibir zańnamalyq aktilerge densaýlyq saqtaý máseleleri boiynsha ózgerister men tolyqtyrýlar engizý týraly" zań jobasyn tanystyrý úshin bardy. Bul arada áleýmettik jelilerde júgirýge qatysqan meditsina fakýltetiniń stýdentteri "erikti-mindetti túrde" jiberilip, tańǵy sabaqtar men emtihandar aýystyrylǵany týraly aqparat paida boldy.
Qumash Telegram-arnasy taratqan aýdiojazbada er adam stýdentterdiń avtobýstarmen Botanikalyq baqqa barý josparyn jáne jarysqa qatysýshylardyń aldaǵy áreketterin aityp beredi. Sondai-aq, is-sharaǵa qatyspaǵandarǵa jaza týraly eskertedi.
Bul týraly tilshiler Ajar Ǵiniiattyń ózinen surady.
"Búgingi marafon Densaýlyq kúnine orai boldy. Densaýlyq kúni búkil el boiynsha bastaldy, ol búkil álemde 7 sáýirde atap ótiledi. Sizdiń málimdemeńizge keletin bolsaq, men habardar emespin. Biz bul máseleni anyqtaimyz", - dep ýáde berdi ministr.
Ýniversitet stýdentterdiń Astanadaǵy jappai júgirý sharasyna qatysatynyn rastady. Bilim oshaǵynyń baspasóz qyzmeti stýdentterdiń mundai sharalarǵa únemi qatysyp turatynyn túsindirdi. Oqý ornynyń málimetinshe, bul oqiǵaǵa bailanysty tergeý bastalǵan.
"Mundai is-sharalar aldyn ala uiymdastyrylyp, óz erkimen qatysýǵa niet bildirgen stýdentterdiń tizimi jasaqtalady. Er adamnyń daýysy shyqqan aýdiohabarlamanyń taralýyna qatysty tekserý bastaldy", - dep habarlady ýniversitettegiler.
