QR Ádilet ministri Marat Beketaev Prezident taǵaiyndaityn keibir kandidatýralardyń Elbasymen nege kelisiletindigine qatysty túsinik berdi, dep habarlaidy QazAqparat.
«Osy másele boiynsha barlyq normalar Qaýipsizdik Keńesi týraly zańdy qabyldaý kezinde bekitilgen bolatyn. Prezident Jarlyǵyna qol qoiyldy, ol barlyq rásimderdi naqty reglamentteidi. Belgili bir laýazymdar kelisýge jatady degen sheshimdi Parlament qabyldap, Prezident qol qoiǵan», - dedi M. Beketaev Úkimet otyrysynan keiin tilshiler saýalyna jaýap bere otyryp.
Onyń paiymynsha, mundai tetik eldegi qos bilik bar degendi bildirmeidi.
«Árine, ondai jaǵdai joq. Kóptegen elderde osy tektes rásimder bar, iaǵni mańyzdy saiasi laýazymdar tiisti organdarmen kelisilip keledi», - dedi ministr.
Vedomstvo basshysynyń aitýynsha, eger de Qaýipsizdik Keńesiniń tóraǵasy usynylǵan kandidatýramen kelispese, onda buǵan qatysty keiingi is-qimyldar reglamentte anyq kórsetilgen.
«Jarlyqta barlyq rásimder naqty kórsetilgen, onda sheshim qabyldanǵansha, konsýltatsiia eskerilgen. Sondyqtan da konsýltatsiia kezinde barlyq máseleler sheshiledi. Sońǵy sheshimdi Qaýipsizdik Keńesi shyǵarady. Bul - alqaly organ. Atap aitqanda, bul sharalar kelisýdiń qalypty rásimi bolyp sanalady», - dedi M. Beketaev.
