Ishki ister ministri Erlan Turǵymbaev Pavlodar oblysynyń Maraldy aýylyndaǵy atystyń mán-jaiyn túsindirip berdi, dep habarlaidy "Ult aqparat".
«Ol jaqtaǵy kól investorǵa jalǵa berilgen. Investor atalǵan kóldiń tabiǵi bailyǵyn baǵyp, balyǵyn aýlaýmen ainalysady. Másele - sanktsiialanbaǵan balyq aýlaý jaǵdailary men arnaiy shaiandardyń aýlanýynda. Biraq, bul shaiandardyń aýlanýy boiynsha arnaiy kvota bar. Kvotadan asyryp, shaiandy aýlaýǵa bolmaidy. Sol sebepti, bul shaiandardy aýlaý boiynsha brakonerlik áreket bolmaý úshin kvota belgilengen. Biraq, jergilikti turǵyndar shaiandy kvotasyz aýlaǵandyqtan, atalǵan kásipker arnaiy kúzet qyzmetin jaldaǵan. Munyń bári ainalyp kelip, jergilikti turǵyndar men kúzet qyzmetkerleri arasynda tóbelespen aiaqtalyp, BAQ-ta kórgenińizdei janjal bolyp, travmatikalyq qarý qoldanylǵan», - dedi Erlan Turǵymbaev Úkimet otyrysynan keiin tilshilerdiń suraǵyna jaýap bere otyryp.
Ministrdiń aitýynsha, osy janjaldyń saldarynan bes adam aýrýhanaǵa túsken.
«Bir jaqsysy, eshkim aýyr jaraqat almapty. Qazirgi tańda ol jerde politsiianyń kúsheitilgen nariady jumys isteýde. Keshe sondai-aq, kúzet qyzmetkerleriniń urlanǵan kóligi de tabyldy. Eki qylmystyq is qozǵaldy. Jaǵdai baqylaýda. Jedel tergeý amaldary bastalyp, oqiǵa ornyna oblystyq Politsiia departamentiniń bastyǵy shyqty. Tolyqqandy aqparatty tústen keiin ol BAQ-qa beredi», - dedi ol.
Ishki ister ministriniń aitýyna qaraǵanda, oblys aýmaǵyndaǵy kólshikterdiń barlyǵy boiynsha kvotany jergilikti atqarýshy organ beredi.
«Janjal ne úshin tirkeldi? Bárin anyqtaimyz», - dedi sóz sońynda ministr.
Aita ketsek, buǵan deiin Pavlodar oblystyq Politsiia departamenti 18 tamyzda jergilikti turǵyndar men kúzet agenttiginiń qyzmetkerleri arasynda atys bolǵanyn habarlaǵan bolatyn. Áý basta kúzet qyzmetkerleri mototsikl arqyly eki qap artemiia salina shaiandaryn áketip bara jatqan Maraldy aýylynyń 32 jastaǵy turǵynyn ustap alǵan. Osydan keiin oqiǵa ornyna jergilikti turǵyndar kelip, taraptar arasynda atys bastalady.
Oblystyq departamentten habarlaǵandai, turǵyndardyń biri kúzet agenttiginiń avtokóligin aidap ketken. Kólik keiin tabylǵany habarlanyp otyr. Tóbeles kezinde politsiia qyzmetkerleri aspanǵa travmatikalyq qarýmen oq atqannan keiin jinalǵandar tarap ketken. Sol kúni túnde Pavlodar qalalyq aýrýhanaǵa 5 adam túsken.
