QR eńbek jáne halyqty áleýmettik qorǵaý ministri Mádina Ábilqasymova oralmandardyń eńbek ótili nege eseptelmei júrgenin túsindirdi, dep habarlaidy Sputnik Qazaqstan tilshisi.
Onyń aitýynsha, qazir ministrlik bul baǵytta birqatar elmen jumys júrgizip jatyr.
"Qazaqstan oralmandardyń eńbek ótilin tolyq esepteýge daiyn. Biraq, biraz qiynshylyq bolyp tur. Máselen, Qytaida eńbek kitapshasy joq eken. Sonyń saldarynan qandastarymyz eńbek ótilin kórsete almai júr. Muny sheshý úshin biz Qytaidyń memlekettik organdaryna arnaiy hat jazdyq. Bir kelisimge kelý úshin. Eger olar kelisim berse, eńbek ótilin tolyǵymen sanaityn bolamyz", — dep sendirdi ol.
Ábilqasymovanyń aitýynsha, bul másele sheshimin tapsa, elge qonys aýdarǵan oralmandar zeinetaqyny ulǵaiǵan mólsherde ala alady. Ministr qazir Qazaqstanǵa qandastarymyz Mońǵoliia, Qytai, Ózbekstan, Resei, tipti Germaniiadan da kóship kelip jatqanyn atap ótti.
Aita ketsek, osy jyldyń 1 shildesinen bastap Qazaqstanda bazalyq zeinetaqy tóleý tártibi ózgerdi. Budan bylai bazalyq zeinetaqynyń mólsheri azamattardyń eńbek ótili men zeinetaqy júiesine qatysý uzaqtyǵyna táýeldi bolady. Bazalyq zeinetaqy eńbek ótiline bailanysty eń tómengi kúnkóris deńgeiiniń 54%-nan 100%-ǵa deiin taǵaiyndalady. 2 millionnan astam zeinetkerdiń zeinetaqysy ósedi. Onyń ishinde 1 millionǵa jýyq adamǵa bazalyq zeinetaqy tolyq mólsherde tólenedi. Al 930 myńǵa tarta zeinetker úshin zeinetaqy 37%-dan 81%-ǵa deiin ósedi.
