Qorǵanys ministri general-leitenant Nurlan Ermekbaev laýazymdy tulǵalarǵa oq-dárilerdi saqtaityn eki bazanyń qurylysyn uiymdastyrý jumystaryn jedeldetýdi tapsyrdy, - dep habarlaidy "Ult aqparat".
Atalmysh nysandardyń qurylysy 2019 jylǵy QR Qarýly Kúshterdegi qarý-jaraq pen oq-dárilerdi saqtaý obektilerin jetildirýdiń keshendi josparynda qarastyrylǵan.
"Nysandardyń qurylysy oq-dárilerdi qaýipsiz saqtaýdyń barlyq jolyn eskere otyryp uiymdastyrylǵan. Sondai-aq, kúzettiń tehnikalyq quraldary, beinebaqylaý jáne avtomatty órt sóndirý júieleri kózdelgen. Onda Qorǵanys ministrliginiń bastamasymen 2020 jyly zańnamaǵa engizilgen ózgeristerge sáikes qoimalardy eldi mekenderden alshaqtatý, sondai-aq arsenaldar men bazalar janyndaǵy tyiym salynǵan aimaqtar men aýdandardyń shekaralaryn saqtaý da eskerilgen", - delingen ministrlik habarlamasynda.
Eske salsaq, Jambyl oblysyndaǵy jarylys boiynsha ótken baspasóz máslihatynan keiin QR Qorǵanys ministri Nurlan Ermekbaev BAQ ókilderine otstavkaǵa ótinish berýge daiyn ekenin aitqan bolatyn.
«Qazirgi ýaqytta basty maqsatym - apattyń saldaryn tez arada joiý. Al sizderdi otstavka máselesi qyzyqtyratyn bolsa, onda men osy habardy estigennen keiin birinshi minýtta ózim úshin sheshim qabyldadym. Men otstavkaǵa ótinish beremin, otsavkaǵa jiberýin suraimyn. Al qalǵanyn joǵarǵy basshylyq sheshedi», - degen edi ministr.
