- QR Mádeniet jáne sport ministri Arystanbek Muhamediuly Facebook áleýmettik jelisinde jeke paraqshasyn ashty.
«Qadirli dostar! Men mádeniet pen sportqa qatysty naqty aqparattardy bólisýge, sondai-aq, osy saladaǵy barlyq mańyzdy máselelerdi talqylaý úshin Facebook áleýmettik jelisinde paraqsha ashýdy jón kórdim. Sonymen qatar, osy paraqsha arqyly jas rejisserlermen, sýretshilermen, ártistermen, ánshilermen jáne de kóptegen daryndy tulǵalarmen tildesýge ári bailanys ornatýǵa daiynmyn. Sebebi bizdiń qasietti jerimiz talantty jandarǵa kende emes. Ózimniń dostaryma sapaly «keri bailanys» pen qoldaý bildirgenderi úshin zor alǵysymdy bildiremin. Barlyq oi-pikirlerdi jeke ózim oqýǵa jáne múmkindiginshe jaýap berýge tyrysamyn» dep bastady ministr alǵashqy jazbasyn.
Ol osy múmkindikti paidalana otyryp, 27 qarashada «Kerýen» SSO-da saǵat 11-00-de balalar úileri men SOS balalar aýylynyń tárbielenýshileri úshin Qazaq handyǵynyń negizin qalaǵan Kerei men Jánibektei handardyń róli týraly baiandaityn «Qazaq eli» animatsiialyq filminiń kórsetilimi uiymdastyrylǵanyn habarlady.
«Otandyq film bizdiń balalarymyzdyń kóńilderinen shyǵady ári osyndai týyndylar arqyly olardy qýantyp qana qoimai, óskeleń urpaqtyń boiyna Otanǵa degen súiispenshilikti sińiremiz degen oidamyn», dep jazdy Arystanbek Muhamediuly.
Ult portaly
