© Photo: Densaýlyq saqtaý ministrligi
Densaýlyq saqtaý ministri Ajar Ǵiniiat qyzylsha aýrýyna qarsy ekpe egilgen nemeresiniń jaǵdaiy týraly aitty, - dep habarlaidy Sputnik Qazaqstan.
Onyń aitýynsha, 5 jasar nemeresine qyzylshaǵa qarsy ekpe egilgen.
"Tórtinshi kúni onyń dene qyzýy kóterildi, qusty. Dárigerler munyń ekpege reaktsiia ekenin aitty. Bir kúnnen keiin bul belgiler basyldy. Men qazir sizderge qalai boldy, solai aityp otyrmyn. Ekpeden keiin osyndai belgiler baiqalýy múmkin", - dedi Ǵiniiat Ortalyq kommýnikatsiialar qyzmetinde ótken baspasóz máslihatynda.
Ministr jalpy halyqta vaktsinalarǵa senim bar ekenin atap ótti.
"On ai ishinde josparly vaktsinalaýǵa kelmegenderdiń úlesi az boldy. Olar shynymen keibir antivakserlerdi tyńdaityn adamdar. Dini senim turǵysynan ekpeden bas tartatyn adamdar da barshylyq. Kúmándanyp, artynan túsindirý jumystarynan keiin vaktsina salǵyzǵandar da bar. Sol sebepti biz aýrý saldarynan negizinen kishkentai balalar zardap shegetinin eskerip, aýqymdy aqparattyq jumys júrgizip jatyrmyz. Ony men ózim bastadym. Vaktsinanyń qaýipsiz, tiimdi ekenin, senýge bolatynyn dáleldeý úshin bes jasar nemeremdi emhanaǵa aparyp, ekpe saldyrttym", - dedi Ǵiniiat.
Ministrdiń aitýynsha, qosymsha jappai vaktsinalaý júrgizý úshin qyzylshaǵa qarsy 1,5 mln doza vaktsina satyp alyndy, onyń 500 myń dozasy jetkizildi. Jeltoqsan aiynda 1 mln doza keledi dep kútilip otyr.
