Densaýlyq saqtaý ministri Eljan Birtanov koronavirýs qaýpine orai balalardyń mektep pen balabaqshaǵa barýyn toqtatý qajettigine bailanysty túsinik berdi, dep habarlaidy QazAqparat.
«Elimizde koronavirýs anyqtalmady. Kúdik bolǵan jaǵdaida, adamdar tolyq tekserýden ótip jatyr. Sáikesinshe, sharalardy shamadan tys shekteýdiń qajeti joq. Alaida qazirgi kezde respiratorlyq infektsiialar kezeńi júrip jatyr», - dedi E. Birtanov tilshiler saýalyna jaýap bere otyryp.
Onyń atap ótýinshe, qoǵamda dúrligýdi boldyrmas úshin buqaralyq sharalardan bas tartý, balabaqsha men mektepke barýdy toqtatý qadamdaryna daiyndalý kerek bolady.
«Ázirge, mundai qadamdardyń qajettigi joq. Eger de osyndai táýekel bolsa, onda tiisti sheshimdi bas memlekettik sanitarlyq dáriger jáne ár óńir jekelei qabyldaýǵa quqyly», - dedi ministr.
Munymen qosa, E. Birtanov ázirgi qater joq ekenin atap ótti.
«Meniń de balalarym mektepke baryp júr. Jalpy, tumaý kezeńi bar bolǵandyqtan, biz únemi asa qajetsiz sharalardy kúzde ári qysta ótkizbeýge keńes beremiz. Mundai nusqaýlar tumaýǵa qatysty berilip kelgen. Atap aitqanda, Qazaqstanda koronavirýs máselesi týyndasa, onda qajetti sheshimder shuǵyl qabyldanady», - dedi Eljan Birtanov.
