QR Ishki ister ministri Erlan Turǵymbaev temir jol ótkelderinen avtokólikpen ótý talaptary kúsheitý máselesi qaralatynyn jetkizdi, dep habarlaidy "Ult aqparat".
«Bizde jol-kólik oqiǵalarynyń 96 paiyzynda júrgizýshilerdiń ózderi kináli bolyp shyǵady. Nashar júrgizýshilik tártip qalyptasqan. Bizde barlyq temirjol ótkelderine jaqyndaǵanda poiyzdyń júretinin eskertetin jol belgileri turady. Úsh jolaq, eki jolaq, sodan keiin bir jolaqtan keiin «Stop» degen belgini kóresiz. Osydan keiin mindetti túrde jan-jaqqa qarap, poiyz bar ma, joq pa kóz jetkizip alý kerek. Bul jaǵdaida júrgizýshilerdiń jaýapkershiligin kúsheitý máselesi bar. Sondyqtan, biz atalǵan máseleni qarap, tiisti usynystardy engizemiz», - dedi QR Ishki ister ministri Erlan Turǵymbaev OKQ-da ótken baspasóz máslihatynda.
Eske sala ketsek, keshe Shamalǵan stantsiiasynda poiyz ben avtobýs soqtyǵysqan bolatyn. Aldyn ala boljam boiynsha, avtobýs temir joldyń relsine shyǵyp ketken.
Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bóliminde jatyr. Onyń ekeýi bala.
Qazir atalǵan fakti boiynsha QR QK 345-babynyń 3-tarmaǵy boiynsha is qozǵalyp, tergeý júrip jatyr. Istiń tergelýin Bas kóliktik prokýratýra óz baqylaýyna aldy.
