Aýyl sharýashylyǵy ministri Erbol Qarashókeev Mańǵystaý oblysynda shalǵai jatqan sharýa qojalyqtaryn aralap, jep-shóp máselesimen tanysty. Óziniń otstavkasyn talap etken fermerge de bardy, dep habarlaidy Sputnik Qazaqstan.
Fermer jylqy men túie baǵady eken. Alaida maldy tirkemegen. Demek malǵa birdeńe bolsa, memleket tarapynan ótemaqy alýǵa múmkindik bolmaidy. Fermerdiń maly statistikada joq, esh jerde esepke alynbaǵan.
Mańǵystaý oblysynda ondai fermerler az emes. Malyn tirkeýge qoiýǵa asyqpaidy. Olar da tótenshe jaǵdai kezinde ótemaqy ala almai, shyǵynǵa ushyraýy múmkin. Soǵan qaramastan, sýbsidiia talap etip otyr. Al ministrlik resmi esepte joq malǵa qarjy bóle almaidy.
"Ministr Erbol Qarashókeev qyzmetke kelgeli beri fermerler úshin osymen úshinshi ret "jasyl dáliz" ashylyp otyr. Oǵan sáikes, árbir fermer esepke alynbaǵan maldy tirkeýge qoia alady", - deidi ministrliktiń baspasóz qyzmeti.
Zań boiynsha maldy eki aidyń ishinde esepke qoiý qajet. Odan keshikken sharýalar ósimpul tóleidi. Al "jasyl dáliz" kezinde ósimpul alynbaidy.
Osy jolǵy "jasyl dálizdiń" merzimi – 1 aqpan men 31 mamyrdyń aralyǵy. Resmi málimetke sáikes, Qazaqstanda tirkeýge qoiylmaǵan maldyń sany 4 323 myń bastan asady.
Ministrdiń aitýynsha, úkimet tirkelgen malǵa ǵana qarjylai kómek bere alady. Máselen, biyl 31 qańtarda úkimet rezervinen qosymsha tirkelgen 71 343 bas malǵa 663,9 million teńge bólindi.
Aita keteri, byltyr Qazaqstannyń birneshe aimaǵynda qurǵaqshylyqtan mal qyryldy. Ásirese, Mańǵystaý men Qyzylorda oblystarynyń fermerleri qatty zardap shekti. Máselen, Mańǵystaý oblysynyń ákimdigi 1 163 bas maldyń qyrylǵanyn málimdegen. Alaida fermerler ol san bes ese kóp dep otyr.
